"As mulleres sen fogar están expostas a un risco maior de sufrir violencia de xénero"

Un estudo elaborado por investigadores da Universidade de Santiago de Compostela, por encargo da Consellería de Política Social, constata a relación directa entre 'senfogarismo' feminino e violencia de xénero.

O informe expón as causas do 'senfogarismo' feminino e estuda a relación coa violencia de xénero a través de entrevistas con expertos, usuarias e profesionais de 27 centros da rede de atención galega a vítimas de violencia de xénero e da rede de centros de atención a persoas sen fogar.

Entre as conclusións do estudo, destaca a opinión destes profesionais de que a falta dun fogar estable e seguro é un factor determinante na aparición da violencia de xénero. Respecto diso, os técnicos inciden en que "é unha realidade que as mulleres sen fogar están expostas a un risco maior de sufrir violencia de xénero, sobre todo cando están en situación 'de rúa', onde están soas, son máis vulnerables, e increméntanse as condutas adictivas".

Ademais, os profesionais coinciden en sinalar que a súa baixa autoestima e a ausencia de relacións sociais fan que as mulleres nesta situación busquen a compañía dun home para ter "estabilidade" ou "un mínimo de protección", aínda que iso implique unha relación forzada, que pode derivar en prostitución "e moi frecuentemente en violencia de xénero".

Por outra banda, tamén apuntan a situación inversa, que a violencia de xénero "pode ser considerada como un factor previo ao 'senfogarismo'" entre as mulleres, aínda que tamén concorren outros factores, como o desemprego, a falta de recursos económicos ou de apoio familiar.

Entre as conclusións do estudo reflíctese que o perfil das mulleres sen fogar atendidas na rede galega de centros en Galicia é o dunha persoa duns 40 anos de idade, e o 71 % é vítima de violencia de xénero (nestes casos, a media de idade baixa lixeiramente).

Tamén se sinala que, nos últimos anos, detectouse un crecemento do 'senfogarismo' feminino (especialmente entre menores de 30 anos e maiores de 65) e, concretamente, do 'senfogarismo' "encuberto", que afecta a mulleres que traballan como 'internas' ou exercen a prostitución en pisos e clubs e pagan un aluguer aos seus xefes.