Por Jessica Fernández | SANTIAGO DE COMPOSTELA | 02/02/2021 | Actualizada ás 20:30
A segunda edición dos Premios Mil Primaveras, convocados pola Coordinadora de Traballadores/as de Normalización da Lingua, pechou o pasado 31 de xaneiro o prazo para presentar proxectos, campañas, accións ou programas de normalización lingüística, na que diferentes servizos de normalización lingüística, equipos de normalización e dinamización da lingua galega, asociacións e outras entidades presentaron 37 proxectos.
O fin dos Premios Mil Primaveras é propoñer proxectos que fomenten a posta en valor e fomentar a lingua e incrementar o seu uso e prestixio. Esta iniciativa, ademais, ten o obxectivo de recoñecer e proxectar o traballo ben feito no ámbito da normalización lingüística, valorar e difundir proxectos positivos e seleccionar boas prácticas que poden servir como modelos.
Nos próximos días, a CTNL nomeará un xurado formado por técnicos/as de normalización lingüística e persoas con recoñecida capacidade en ámbitos como a planificación lingüística, a intervención social, a xestión de proxectos sociais e/ou a comunicación para seleccionar as campañas que resultarán recoñecidas nesta segunda edición dos premios.
NACEMENTO DOS PREMIOS MIL PRIMAVERAS
Os II Premios Mil Primaveras promóveos e organízaos a CTNL coa colaboración económica da Deputación Provincial de Pontevedra e da Secretaría Xeral de Política Lingüística.
Con eles, a CTNL pretende valorar e proxectar o gran labor que se desenvolve no ámbito da normalización lingüística, dar visibilidade a proxectos positivos e seleccionar boas prácticas que poidan servir como modelo e inspiración para mellorar o traballo en normalización da lingua.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.