O Sergas indica que a ocupación na UCI creceu un "37%" nos últimos 7 días
Un total de 19 pacientes foron trasladados desde a área de Ferrol a outros hospitais e sete desde centros de Pontevedra a Vigo.
- Protestas no Clínico de Santiago: “a Xerencia quérenos asustar para que deixemos as mobilizacións”
- A covid dá o primeiro paso atrás en Galicia cunha baixada de casos activos e pacientes en UCI
- O CHUAC, sen camas de UCI libres: “non sei que vai pasar nos próximos días”
Por Europa Press / Redacción | SANTIAGO DE COMPOSTELA | 03/02/2021 | Actualizada ás 15:22
O xerente do Servizo Galego de Saúde (Sergas), José Flores, informou de que a evolución dos últimos sete días as unidades de coidados intensivos experimentou un incremento de case o 37% a pesar de que xa se iniciou un "achaiamento" no número de pacientes que ingresan nos hospitais. "Aínda seguen as unidades de críticos sufrindo o aumento de casos ingresados a pesar de que a hospitalización xa comezou a baixar", destacou Flores na rolda de prensa posterior á reunión do Comité Clínico ofrecida xunto ao conselleiro de Sandiade, Julio García Comesaña.
Na súa intervención, detallou que a ocupación das unidades de hospitalización convencional pola covid-19 en Galicia sitúase en torno ao 16% tras experimentar nos últimos sete días unha "evolución mínima, inferior ao 1%" que mostra un "achaiamento" nos ingresos. Con todo, precisou que as unidades de críticos manteñen unha "ocupación maior".
"Se falamos das camas estruturais que teñen todos os hospitais galegos para atender a pacientes críticos estariamos ao redor dun 42%" de ocupación pola covid, detallou José Flores, que explicou que hai varios hospitais --como os da Coruña, Santiago e Vigo-- que teñen capacidade para "expandirse a certas áreas que inicialmente non se destinan á atención de críticos", medida que permite baixar a porcentaxe en "10 puntos", ata o 32% sobre o número máximo de camas que se poden destinar á atención de pacientes críticos.
Flores lembrou que todos os hospitais teñen os plans de continxencia en marcha e explicou que os que están xa en fase tres --sendo a catro a máis extrema-- son os da Coruña, Ferrol e Pontevedra tanto en hospitalización convencional como en críticos.
A este respecto, o conselleiro de Sandiade, Julio García Comesaña, apuntou que tanto A Coruña como Ferrol están "preto da fase catro" nas unidades de críticos. "Aínda non chegaron a esa fase e, por suposto, estamos a pensar en alternativas se se chegase", indicou Comesaña, que incidiu no concepto do Sergas como un "hospital único". "Permítenos anticiparnos e trasladar pacientes cando eses niveis de cambio de fases están preto para que non sucedan", apuntou para asegurar que o Sergas traballa deste xeito desde "hai semanas", un labor que "está a ser efectivo".
TRASLADOS
Precisamente, na rolda de prensa, Flores informou de que desde fai "un par de semanas" o Sergas leva a cabo traslados de pacientes de calquera das áreas á cama final "na que vaia a recibir os coidados necesarios en función das necesidades que teña". "Están a establecerse os chamados corredores sanitarios que permiten que calquera paciente que accede ao servizo público de saúde vai ter a garantía de que, con máis ou menos percorrido, vai acabar ingresado nun sitio no que se garantan os coidados que necesiten".
A este respecto, detallou que, ata o momento, xa se trasladou a 19 pacientes da área sanitaria de Ferrol e a sete da área sanitaria de Pontevedra, que foron destinados a un centro de Vigo. Flores precisou que, polo momento, o resto das áreas continúan sendo "autosuficientes" sen necesidade de apoio por parte das outras áreas.
ACTIVIDADE CIRÚRXICA
O xerente do Sergas lembrou que a situación da covid-19 motivou que se "estea reprogramando" a actividade cirúrxica en función das "necesidades diarias apreciadas en cada unha das áreas". Así, aínda que sinalou que hai hospitais que "non necesitaron ata o día de hoxe facer ningunha repogramación, como o caso de Lugo", hai outras que "desde hai uns días" realizan unha nova programación das operacións segundo a actividade que teñan cada día.
"Iso si", precisou, "sempre respectando todas as urxencias e todos os plans contemplados na lei de garantías tanto en cirurxías oncolóxica como no resto das patoloxías". Flores indicou que as cirurxías ambulatorias si se manteñen xa que eses pacientes "non ocupan camas posteriormente ao seu ingreso". Sobre este punto, o conselleiro de Sanidade subliñou que "non se contempla" que ningunha intervención de "prioridade unha" sexa atrasada "se non é materialmente imposible" levala a cabo. "É o último elemento cirúrxico que se podería anular", sinalou.
