A CIG convoca mobilizacións este domingo para "unha saída galega xusta da crise"

A CIG desenvolve desde o mes de outubro unha campaña por "unha saída galega xusta da crise", no marco da cal convocou para este domingo, 7 de febreiro, unha xornada de mobilizacións para esixir políticas que permitan unha recuperación socioeconómica e condicións "dignas" aos galegos.

As mobilizacións, explicou a CIG, desenvolveranse en toda Galicia para denunciar que as medidas propostas e adoptadas polo Goberno central e o autonómico son "insuficientes ou inexistentes" para dar unha resposta á crise derivada da pandemia.

Para facer fronte a esta situación a central sindical propón un plan de recuperación económica, industrialización e creación do emprego "digno" mediante unha batería de medidas que foi remitida aos partidos políticos e ás asociacións patronais.