Por Europa Press / Redacción | Carballo | 04/02/2021 | Actualizada ás 18:01
O Concello de Carballo solicitou ao Servizo Galego de Saúde (Sergas) a realización dun cribado xeral na poboación e informou de que, a data deste xoves, conta con 367 casos activos, tras alcanzar un pico de 400 o pasado sábado.
A comisión de seguimento da covid-19 neste concello analizou a evolución sanitaria na localidade, e o alcalde, Evencio Ferrero deu conta dos datos trasladados polo Sergas.
O Concello considera que, "despois de alcanzar o pico máximo con 400 casos activos o pasado sábado, a situación parece empezar a mellorar aínda que "continúa sendo moi preocupante".
O alcalde referiuse especialmente á residencia de maiores, na que xa se rexistraron máis dunha vintena de falecidos e aínda hai máis de cen persoas afectadas pola covid-19.
Ademais, explicou que, tras os cribados sectoriais realizados, pediu á xerencia da área sanitaria a realización dun xeral no municipio ao considerar que sería importante realizar "probas masivas", como se realiza por parte do Sergas noutros concellos galegos, dada a incidencia do virus en Carballo.
Na reunión, ademais, tanto a Garda Civil como a Policía Local informaron de que realizan controis diarios para velar polo cumprimento das restricións por parte da poboación e sinalaron que os principais incumprimentos están relacionados cos peches perimetrales, motivo polo que a Policía Local tramitou nos últimos días 51 denuncias.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.