A Xunta xa ten un candidato para substituír á delegada en Pontevedra condenada pola xustiza
O alcalde de Rodeiro, Luís López, perfílase para este posto.
Por Europa Press / Redacción | SANTIAGO DE COMPOSTELA | 06/02/2021 | Actualizada ás 13:01
O alcalde popular de Rodeiro, Luís López, perfílase como o novo delegado da Xunta en Pontevedra despois de que Luisa Piñeiro renunciase a este cargo ao ser condenada a dous anos de cárcere e oito de inhabilitación por prevaricación e fraude.
Diso informan fontes do Goberno galego a Europa Press, despois de que o venres Piñeiro anunciase en rolda de prensa que deixa o seu posto de delegada da Xunta en Pontevedra.
O Xulgado do Penal número 3 de Pontevedra condenou a Piñeiro e ao expresidente da Deputación de Pontevedra e actual presidente da Federación Galega de Fútbol, Rafael Louzán, ao considerar probado que cometeron irregularidades para outorgar 86.311 euros a unha construtora para compensala por un sobrecusto nas obras do campo de fútbol de Moraña.
Nacido en Rodeiro en 1978, Luís López é licenciado en Dereito pola Universidade de Santiago de Compostela (USC), desenvolveu o seu labor profesional na empresa privada como técnico de organización. Tras ser concelleiro de Educación e Deportes entre 2003 e 2007, en 2010 foi elixido presidente local do PP de Rodeiro. É alcalde deste municipio desde 2011.
