Só tres positivos nas 4.000 probas realizadas o sábado no cribado a veciños de Santiago e Ames
A Xunta informou inicialmente dun só caso.
Por Europa Press / Redacción | Compostela | 07/02/2021 | Actualizada ás 18:52
O cribado masivo realizado polo Servizo Galego de Saúde (Sergas) a veciños de Santiago e Ames (A Coruña) ao longo do fin de semana permitiu descubrir, por agora, tres positivos de entre as 3.986 persoas que acudiron na xornada do sábado, tras os novos datos da Xunta que, inicialmente, apuntaban só un caso.
Segundo informa a área sanitaria de Santiago e Barbanza, durante o primeiro día participaron o 66,44% dos citados a realizarse a proba no recinto feiral de Amio. En concreto, este cribado abarca a 3.300 cidadáns aleatorios de Ames entre 41 e 50 anos, ademais doutros 8.700 veciños de Santiago de Compostela de entre 46 e 55 anos. Aínda que este sábado permitiu descubrir un caso positivo de covid-19, as probas continúan este domingo.
CRIBADOS SEN POSITIVOS EN MELIDE E AGOLADA
Ademais, o Sergas realizou entre o venres e o sábado un cribado no centro de saúde de Melide (A Coruña) ao que estaban chamadas unhas 1.700 persoas de entre 31 e 50 anos. Alcanzou unha participación do 69,55% e non desvelou ningún positivo.
A área sanitaria de Santiago tamén organizou este sábado un dispositivo para realizar a proba a 800 cidadáns de Agolada (Pontevedra) de entre 16 e 70 anos, que debían acudir ao centro de saúde do municipio. Participaron o 71,55% do total e tamén se saldou con cero casos novos.
FERROL
Tamén convocou a uns 3.000 profesionais da área sanitaria de Ferrol para realizar un cribado de detección da covid-19 a través de probas PCR en saliva.
