Verín quere 'manter viva a chama do entroido'

O pasado día 4 de febreiro fíxose o reparto de máscaras temáticas do Entroido nos centros educativos de Verín, acción que se complementa cunha campaña de visibilización nas plataformas dixitais institucionais e a distribución entre os establecementos comerciais de Verín de pancartas para os balcóns e chapas, destinadas aos veciños e veciñas de Verín.

“Entroido de Verín, sempre latexando”

Este é o lema escollido para promover o Entroido este ano, no que a programación presencial  tivo que ser suspendida. O obxectivo da campaña é contribuír, de  maneira segura e responsable, a manter vivo o espírito entroideiro.

Para iso, a concellería de Cultura e Festexos programa varias accións específicas que comezaron co xoves de compadres, e rematarán o vindeiro mércores de cinza.

O  Concello de Verín, en colaboración coa Asociación de Hostaleiros de Verín (AEHCOM) e a Asociación de Empresarios de Verín (AEVER)  -así como co resto de negocios que conforman o comercio local- realizarán unha distribución masiva de chapas e pancartas de balcón destinadas a "manter viva a chama do Entroido".

Outra das accións programadas será unha campaña promocional que se lanzará a través da web e redes sociais oficiais do Concello. Consistirá na reedición do diferente material audiovisual recompilado nas últimas edicións do Entroido, co que se realizarán publicacións diarias que permitirán á veciñanza e amigas/os do entroido de Verín rememorar todos os grandes momentos que se viven nestas tradicionais festas.

A concelleira de Cultura, Emilia Somoza, anunciou que "dada a gran acollida que tivo entre a veciñanza a  iniciativa das máscaras temáticas, desde o Concello de Verín decidimos abrir a venda ao público xeral". Os cubrebocas poderán mercarse na taquilla exterior do Pavillón Municipal de Deportes (rúa Irmáns Moreno) por un prezo de 5 euros, entre este luns 8 e o venres 12 de febreiro. (Horario: Pola mañá, de 10:00 a 13:00; Pola tarde, de 16:00 a 18:00 horas).

REFORZO DA SEGURIDADE

Desde a área de Tráfico, Seguridade Cidadá e Protección Civil, dirixida por Cándida Couñago, confirmaron que, malia non haber programación presencial, manterase o reforzo dos efectivos ordinarios de Policía local, que como vén sendo habitual realízase nos principais días do  Entroido, coa finalidade de garantir o cumprimento das medidas sanitarias vixentes.

Neste senso, Couñago trasladou unha mensaxe á veciñanza, apelando á súa responsabilidade e remarcando que "Queremos lembrar aos veciños e veciñas de Verín que a nosa Comunidade Autónoma atópase en nivel máximo de restricións e, entre outras medidas, están totalmente prohibidas as reunións de non conviventes tanto no ámbito privado como público".