Feijóo abre a porta a relaxar as restricións a partir da próxima semana

O presidente da Xunta, Alberto Núñez Feijóo, abriu este luns a porta a relaxar as restricións da covid 19. Como sinalou nunha rolda da prensa este luns, recoñida por G24Noticias, Feijóo ve xa "posible" que "a mediados da próxima semana" se poida dar "algún respiro" ao aliviar algunhas das restricións decretadas fronte o avance da pandemia da covid.

Así o apuntou o titular do Goberno galego na Coruña, onde celebrou o "o primeiro dato optimista" e "esperanzador", a baixada da positividade ao 4,5 % este domingo con "só 500 novos infectados". "É un optimismo condicionado porque a presión hospitalaria segue sendo alta", recoñeceu Núñez Feijóo, que apuntou que mañá se celebrará unha reunión do comité clínico na que non se rebaixarán as medidas nin se establecerán limitacións novas. 

No encontro, avanzou, terá lugar unha "análise" da situación "concello por concello" e estudarán "cal é a previsión da curva".  Respecto da vacinación, sinalou que o obxectivo de Galicia é finalizar este mes coas dúas doses de todo o persoal do Servizo Galego de Saúde e indicou que neste mes empezarase a administrar nos centros de día e en persoas maiores de oitenta anos. "Cando haxa vacinas non haberá ningunha restrición", recalcou o presidente da Xunta. Feijóo avanza deste xeito que non prolongará as medidas restritivas máis alá do prazo inicialmente posto, malia que, como el mesmo recoñeceu, os datos de ocupación de UCIs seguen batendo marcas históricas.