Por Europa Press / Redacción | SANTIAGO DE COMPOSTELA | 08/02/2021 | Actualizada ás 16:04
A Policía Local de Marín tramitou no último fin de semana 44 denuncias relacionadas coas medidas de protección ante a Covid-19 e interveu tres festas privadas, unha delas dun grupo de 16 mozos sen máscara nun chalé abandonado.
Segundo informaron fontes da Policía Local, o sábado día 6 pola tarde un veciño denunciou que nun chalé abandonado do municipio había unha festa na que os mozos fumaban e bebían.
Ao chegar a patrulla puido comprobar que nesta reunión participaban polo menos 16 persoas e que tiñan preparadas bebidas e música. Ademais, non facían uso de máscaras de protección. Unha vez disolta esta reunión non autorizada debido ás restricións vixentes en toda Galicia para frear a pandemia da Covid-19 --entre as que se limitan as reunións a convivientes-- os axentes propuxeron para sanción aos intervenientes.
Nese mesmo sábado pola noite, a Policía Municipal recibiu outra chamada para denunciar unha festa ilegal nun piso no que había "moito ruído" e "bastantes persoas" no interior. O residente deste inmoble admitiu ante os axentes municipais que estaba de celebración con varios amigos non convivientes, pero negouse a clausurala e asumiu as consecuencias pola devandita festa.
Xa o domingo pola tarde, novamente tras requirimento veciñal, a Policía Local marinense comprobou que oito mozos estaban de botellón nun espazo natural, aínda que neste caso ao ser requiridos polos axentes desistiron da súa actitude, e recolleron, ademais, os restos e envoltorios das consumicións.
PONTEVEDRA
POr outra banda, a Policía Nacional tramitou, no marco dos controis para frear a Covid-19, 14 actas de denuncia por reunión de non convivientes e outras 11 actas por non usar máscaras e a celebración de botellóns durante os controis realizados o fin de semana pasado na cidade de Pontevedra.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.