Por E.P. | A CORUÑA | 08/02/2021 | Actualizada ás 18:07
A Deputación da Coruña apoiará iniciativas de Correlingua para incentivar o uso do galego e a súa normalización como medio de comunicación entre a xente nova, segundo informa.
O presidente da Deputación da Coruña, Valentín González Formoso, o presidente da Asociación Cultural Correlingua, Xosé Anxo Teherán, e a deputada de Igualdade e Normalización Lingüística, María Muíño, asinaron este luns o acordo polo que o ente provincial compromete unha achega de 20.000 euros.
O convenio de colaboración permite financiar concursos escolares; un certame musical; festas do Correlingua en liña nos concellos da Coruña, Narón, Rianxo e Zas ou dúas unidades didácticas nas aulas, entre outras actividades.
Ademais, o organismo provincial dará continuidade ao seu apoio á Universidade Internacional Menéndez Pelayo (UIMP) a través dunha achega de 40.000 euros para cofinanciar as actividades docentes e culturais que desenvolve na súa sede na Coruña.
OUTROS CONVENIOS
Por outra banda, a través dun convenio asinado polo presidente provincial e alcalde das Pontes, Valentín González Formoso, e o tenente alcalde da localidade, Antonio Alonso, ambas as institucións financiarán un proxecto valorado en 228.796,59 euros para levar a cabo unha renovación íntegra do pavillón polideportivo Monte Caxado, nesta localidade.
O presidente da Deputación da Coruña, Valentín González Formoso, tamén asinou coa concelleira de Cerceda e deputada provincial Cristina Capellán a renovación do convenio polo que a Fundación Axencia Enerxética Provincial da Coruña (Faepac), manterá os servizos de asesoramento ao municipio en materia de aforro e eficiencia enerxética.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.