Galicia lidera os ingresados en UCI do Estado na última semana, unha cuarta parte do total
Madrid e Cataluña, moito máis poboadas, só rexistran 15 e 11 ingresos, respectivamente.
Por Europa Press / Redacción | SANTIAGO DE COMPOSTELA | 09/02/2021 | Actualizada ás 20:27
Un total de 105 persoas con covid ingresaron en UCI en Galicia na última semana, o que supón unha cuarta parte dos 439 que así o fixeron en toda España.
Deste xeito figura nos datos publicados este martes polo Ministerio de Sanidad --con información actualizada do 8 de febreiro--. De feito, estes 105 ingresados en UCI galegas supoñen máis do dobre da seguinte autonomía, Andalucía (50 pacientes). En cambio, as comunidades máis poboadas como Madrid e Cataluña, só rexistran 15 e 11 ingresos, respectivamente. Á cola atópase País Vasco, con só tres.
Pola súa banda, son 603 as persoas con coronavirus que necesitaron hospitalización en Galicia nos últimos sete días --os pacientes que precisaron UCI tamén computan aquí--. Esta cifra é a segunda maior entre autonomías, por detrás de Andalucía (1.183). O número global de España é de 5.348.
En total, Galicia conta con 225 pacientes ingresados en UCI, polo que o seu grao de ocupación de camas é do 31,16%, por baixo da media española (42,28%). En todo o país hai 4.594 persoas en UCI. Os pacientes covid hospitalizados en xeral (tamén inclúe a UCI) son 1.195 en Galicia, cun nivel de ocupación do 15,46% (menos que o 20,4% da media). En España son 26.101.
