Un detido e 184 propostas de sanción nas últimas 24 horas por incumprimento das restricións sanitarias
Houbo 661 dispositivos de seguridade.
Por E.P. | Santiago de Compostela | 10/02/2021 | Actualizada ás 17:26
Unha persoa detida e 184 propostas de sanción é o balance nas últimas 24 horas dos controis de seguridade para o cumprimento das restricións sanitarias, segundo informa a Delegación do Goberno en Galicia.
En concreto, as Forzas e Corpos de Seguridade do Estado despregaron durante as últimas 24 horas en Galicia un total de 661 dispositivos de seguridade, que alcanzaron a 9.704 persoas e a 7.164 vehículos.
A Garda Civil e a Policía Nacional mobilizaron a 1.220 axentes nas catro provincias, que formularon un total de 184 propostas de sanción e efectuaron unha detención.
A Benemérita dispuxo 571 operativos coa participación de 907 axentes. Froito do seu traballo, foron identificadas 7.525 persoas, 5.707 vehículos controlados e 130 persoas sancionadas.
Pola súa banda, a Policía Nacional levou a cabo durante a pasada xornada 90 dispositivos de vixilancia nos que participaron 313 axentes. Nestes operativos efectuouse a identificación de 2.179 persoas e o control de 1.457 vehículos. En total, os axentes da Policía Nacional elevaron 54 propostas de sanción e detiveron a unha persoa.
BALANCE NA PROVINCIA LUCENSE
Só na provincia de Lugo, segundo os datos achegados pola Subdelegación do Goberno, desde o pasado mércores despregáronse un total de 718 dispositivos e mobilizáronse 1.345 axentes que identificaron un total de 8.857 persoas e controlaron 7.477 coches.
Nos sete días comprendidos entre o 2 e o 9 de febreiro, a Garda Civil e a Policía Nacional formularon un total de 242 propostas de sanción polo incumprimento das medidas sanitarias.
Os datos fixéronse públicos coincidindo coa reunión semanal do Centro de Coordinación Operativo da provincia, presidido pola subdelegada, Isabel Rodríguez.
Por outra banda, o Concello de Lugo comezou a tramitar o cobro das case 1.000 sancións impostas en Lugo desde xuño por infraccións á normativa autonómica do Covid, segundo informa.
A encargada deste labor será a empresa que asume a colaboración na xestión administrativa e recadación de multas despois de que a xunta de goberno local autorizase este mércores a modificación do contrato en vigor.
