UXT e CCOO esixen ao Goberno que derrogue a reforma laboral e de pensións do PP

Case un centenar de delegados sindicais de UXT e CCOO concentráronse ante a Delegación do Goberno en Galicia, na Coruña, para esixir ao Executivo central que derrogue a reforma laboral e a de pensións aprobadas polo PP e que inclúa na súa "folla de ruta" os acordos comprometidos nos seus programas electorais en materia sociolaboral.

Así o trasladaron os secretarios xerais de ambos os sindicatos, José Antonio Gómez (UXT) e Ramón Sarmiento (CCOO), na protesta celebrada na Coruña no marco dunha xornada de mobilizacións baixo a lema 'Agora si toca' e que tiveron lugar no resto de cidades galegas.

O secretario xeral de UXT en Galicia, José Antonio Gómez, recalcou que é "o momento de que o Goberno poña na súa folla de ruta o que ten comprometido no acordo de goberno, nos seus programas electorais".

"Colocar a axenda sociolaboral dentro das reformas necesarias que hai que facer", dixo en referencia á reforma laboral do PP e tamén a das pensións de 2013. Sobre a primeira, manifestou que supuxo "maior precariedade e un desemprego xuvenil insoportable", mentres que con respecto das pensións insistiu en que a reforma de 2013 "fíxose á marxe do Pacto de Toledo".

Gómez reclamou tamén que se aborde a subida do salario mínimo interprofesional. "Non se pode vivir con 900 euros", recalcou, incidindo en que esta situación afecta sobre todo as mulleres e colectivos "que aplaudimos durante a pandemia".

SAÍDA DA CRISE

Pola súa banda, Ramón Sarmiento, subliñou que a sociedade "ten que ser consciente de que estamos nun momento crucial. Vaise a decidir cal é a saída deste proceso, non só na crise sanitaria se non tamén na económica e social".

Por iso, defendeu a necesidade destas mobilizacións para "presionar" e que esta saída sexa "baixo os alicerces da xustiza social". Neste contexto, apelou ao acordo no plano do diálogo social, o político e institucional. "Xogámonos cal vai ser a saída desta crise".

Mentres, preguntado pola situación industrial en Galicia, defendeu a necesidade de "tempo, recursos e acordos" e recalcou que "a día de hoxe non se dá ningún destes parámetros", en referencia á situación de distintas empresas. Nalgúns casos, demandou, ademais, a "intervención pública de determinadas factorías".