Marea Atlántica reclama a condonación da débeda ao porto da Coruña

A portavoz de Marea Atlántica, María García, volveu reclamar a condonación da débeda ao porto coruñés, tras un encontro co presidente da Autoridade Portuaria, Martín Fernández Prado. Este, á súa vez, manifestou que o organismo portuario está aberto "a calquera fórmula" que garanta a "sustentabilidade económica".

Ambos descartaron que condonar a débeda poida prexudicar á imaxe da cidade. En concreto, María García remitiuse á condonación da débeda no caso de Valencia. "E non repercutiu na súa reputación, máis ben o contrario".

Fernández Prado considerou necesario "xerar un novo marco, non só financeiro", apuntou ao referirse á necesidade de abordar cuestións como "os custos de urbanización" e que "se quere facer", dixo sobre o futuro dos peiraos interiores. "Hai que urbanizar estas zonas se non será unha chaira portuaria de asfalto", apuntou respecto diso.

Mentres, congratulouse polo anuncio de Repsol do próximo inicio das obras do poliducto desde a refinaría ao porto exterior para o traslado do cru. "Deixaremos de ter os grandes petroleiros dentro da baía", remarcou.

Pola súa banda, os edís de Marea Atlántica trasladaron na reunión ao presidente do porto a súa proposta de que impulse un pacto contra a débeda do porto e que para esta formación debe asumir o Estado.

"As achegas doutras administracións serán necesarias para a transformación urbana dos peiraos, sempre desde a titularidade pública, non para tapar un buraco financeiro con intereses próximos á usura", expuxo García. Ademais, avogou por que os fondos públicos se destinen á construción de equipamentos, mellorar a mobilidade, gañar espazo público e dar servizo aos barrios.