Feijóo: "non entendo como un graduado en medicina pode criticar a vacina"
Califica de "profundamente desacertadas" as declaracións dun xefe do CHUO sobre a vacina.
Por E.P. | SANTIAGO DE COMPOSTELA | 11/02/2021 | Actualizada ás 18:19
O presidente da Xunta, Alberto Núñez Feijóo, cualificou de "profundamente desacertadas" as declaracións do xefe de sección de Alergoloxía do Complexo Hospitalario Universitario de Ourense (CHUO), Carlos González da Costa, contra a vacina da covid-19, unhas palabras que están a ser investigadas pola Consellería de Sanidade por se puidesen ser constitutivas da apertura dun expediente informativo.
Na rolda de prensa posterior ao Consello da Xunta deste xoves, o mandatario autonómico manifestou a súa incomprensión sobre "como graduados en medicina, cun título de especialista e mesmo con responsabilidades" na organigrama dun centro hospitalario "poden facer estas declaracións".
En concreto, o doutor González da Costa difundiu esta semana un vídeo no que, tras identificarse como médico, rexeita a "vacinación obrigatoria" e tacha de "experimento xenético" a vacina, á vez que anima á poboación a investigar sobre o tema na páxina web da plataforma Médicos pola verdade.
Tras lembrar que Sanidade atópase analizando estas declaracións por se puidesen derivar na apertura dun expediente, Núñez Feijóo incidiu en que a vacina contra a covid é "a única esperanza" fronte á crise sanitaria e constitúe "a ferramenta decisiva para parar o virus".
"Non o dicimos os políticos, dio a comunidade científica", reivindicou o presidente galego que apelou a combater estas declaracións que, aínda que considera "anecdóticas", cre que provocan "moito desasosego" entre a poboación.
