Deseñadores piden flexibilizar os peches perimetrais para que se poidan celebrar vodas

O deseñador galego e xerente das marcas de moda galega Matteôs Noivas e Matteôs Couture, José Matteos, solicitou á Xunta a flexibilización dos peches perimetrais vixentes nos municipios da comunidade para clientes que acudan con cita previa a establecementos do sector, que se atopa "en perigo" dada a afectación da pandemia.

Nun escrito remitido ao director xeral de Comercio e Consumo, Manuel Heredia, o deseñador coruñés advertiu de que as restricións poden levar o "peche definitivo" de establecementos do sector, polo que pediu que se permita o desprazamento de clientes con citas acordadas para probas de vestidos e traxes co obxectivo de "salvar" a campaña de 2021 tras un "nefasto" 2020.

Matteos resaltou que, a diferenza doutros sectores, a maior parte dos establecementos de moda reciben clientes procedentes de distintos puntos da comunidade e sinalou que non puido realizar citas programadas desde hai meses debido aos peches perimetrales.

Neste sentido, explicou que os servizos de confección, os axustes e a entrega dos vestidos requiren que as noivas realicen varias visitas ao seu taller. Así, lamentou non poder levar a cabo as probas concertadas coas case 500 clientas que suma entre as que aprazaron a este ano a súa voda ou a previron de modo inicial para 2021.

Imaxe de recurso dunha celebración dunha voda | Fonte: pixabay.com