Por E.P. | Pontevedra | 12/02/2021 | Actualizada ás 18:36
As fachadas do pazo provincial de Pontevedra, sede da deputación, e das casas consistoriais de seis concellos pontevedreses iluminaranse do 24 de febreiro ao 2 de marzo coa imaxe de Rosalía de Castro para conmemorar á escritora galega no seu día.
Co obxectivo de adaptar as celebracións do Día de Rosalía (24 de febreiro) ao contexto actual marcado pola pandemia, a Deputación de Pontevedra ideou esta acción de 'mapping' coa que se proxectará a imaxe da creadora en sete edificios oficiais da provincia.
"A idea que temos é que o público comparta as súas fotografías coas fachadas iluminadas nas redes sociais cos hashtags #CoaForzadeRosalía, #DíadeRosalía e #ADepoconRosalía", explicou a presidenta provincial, Carmela Silva, na presentación da iniciativa coa que a deputación quere "celebrar ao grande, como cada ano" o Día de Rosalía.
Ademais, o 24 de febreiro terá lugar un acto cultural en honra á escritora. Será retransmitido por Internet desde o pazo provincial, xa que o público non poderá asistir debido á situación sanitaria.
O acto estará protagonizado por nenos e nenas da provincia, que lerán poemas de Rosalía. Ademais, Anna R. Figueiredo será a encargada de ler un manifesto impulsado pola Asociación de Escritoras e Escritores en Lingua Galega e a artista Uxía Senlle porá a música.
CONCURSO DE DEBUXO
Outra das novidades deste ano é a convocatoria dun concurso de debuxo dirixido a escolares. Baixo o nome 'A nosa Rosalía', os pequenos da provincia plasmarán sobre o papel a súa idea sobre a creadora de 'Cantares gallegos'.
"Temos a sorte de ser unha comunidade que ten como elemento simbólico a unha muller, a Rosalía de Castro", indicou Silva, que subliñou a importancia de "achegar a súa figura ao público máis novo, porque é fundamental que teñan compromiso con todo" o que, di, representa a escritora.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.