Ecoloxistas galegos cualifican como "vital" o plan europeo de economía circular

Distintas asociacións ecoloxistas de Galicia definiron o novo 'Plan de Acción para a Economía Circular' como unha normativa vital, "imprescindible" para "frear a irresponsabilidade ambiental" de España, e concretamente Galicia que, segundo os últimos datos, "non alcanzan os estándares de reciclaxe e reutilización marcados pola Unión Europea".

"O plan será moi útil, unha ferramenta imprescindible para cumprir as necesidades ambientais de Galicia. Achega o amparo normativo necesario para traballar nesa materia pendente que é a pegada ambiental", indicou o responsable de Galicia Ambiental, Benito García.

O novo plan de acción para a economía circular, traballado en base a un anterior do ano 2015 e enmarcado no coñecido como Pacto Verde Europeo que se presentou en marzo, foi aprobado o pasado mércores polo Parlamento Europeo a proposición da Comisión Europea, responsable da creación do documento.

Pola súa banda, a integrante de Amigos da Terra, María Durán, mostrouse algo máis recelosa, non do plan europeo, que valora "positivamente", senón respecto da súa aplicación en Galicia. "O plan indica que toda investimento debe responder a sistemas de economía circular, e aquí estamos moi lonxe deses sistemas", trasladou Durán.

GALICIA SÓ RECICLOU O 20% DOS RESIDUOS XERADOS EN 2018

O Ministerio para a Transición Ecolóxica e o Reto Demográfico (Miteco) publicou a principios de febreiro a súa memoria anual de xeración e xestión de residuos para o ano 2018, no que sinala que España xerou 22.264.824 toneladas de residuos, dos que só se reciclou un 35%. "España está na cola da circularidade", criticou Benito García, que fixo especial fincapé na situación "inaceptable" de Galicia en canto a xestión de residuos.

Segundo o mesmo informe do Miteco, a comunidade galega é a sexta rexión que xerou en 2018 máis residuos, 1.144.762 toneladas --o que equivalería a 423,51 quilos producidos por cada galego--, só por detrás de Andalucía, Cataluña, Madrid, Comunidade Valenciana e Canarias. Do total de residuos, Galicia só reciclou --sumando diferentes procesos-- o 20%.

Estas cifras levaron a 16 asociacións ecoloxistas, entre elas os galega Amigos da Terra, a presentar unha denuncia contra o Estado español ante a Comisión Europea pola xestión de desfeitos, que non alcanzou a marca estipulada pola UE para 2020: reciclar o 50% dos residuos municipais.

A "CONTROVERTIDA" NOVA LEI AUTÓNOMICA DE RESIDUOS

A este respecto, o Parlamento de Galicia aprobou este martes, mediante a maioría absoluta do PPdeG e cos votos en contra do BNG e PSdeG, a Lei de residuos e chans contaminados coa que o Goberno autonómico pretende "camiñar cara á economía circular, que substitúa e desterre o modelo tradicional de extraer, usar e tirar".

Con todo, ecoloxistas galegos non acaban de ver con bos ollos a nova norma galega, que consideran "precipitada", xa que se adianta á que o Executivo central está a preparar sobre o mesmo tema e que previsiblemente fará seus parte dos obxectivos expostos pola UE. Unha lei, á que entón a galega tería que adaptarse.

"A lei española, aínda que non é perfecta, é moito máis esixente. Non entendemos a publicación dunha lei autonómica que terá que acabar por revisarse", criticou a integrante de Amigos da Terra. "Esta norma é un exemplo da maquillaxe ambiental ao que se está sometendo a política en xeral", comentou Benito García. "O goberno autonómico fala de 'peso de residuos', cando en realidade deberían falar do tratamento en si. As toneladas e os volumes son cifras enganosas, xa que os colectores teñen certa porcentaxe de impurezas", explicou o ecoloxista galego.

GALICIA, POR BAIXO DA MEDIA ESTATAL EN VERTEDURAS, PERO MOI POR ENCIMA EN INCINERACIÓN

Galicia Ambiental recriminou tamén ao Executivo que "perpetúe" o 'modelo Sogama' --Sociedade Galega de Medio Ambiente--, un punto no que coincide a Asociación Adega que, consultada por Europa Press, destacou que Galicia "fai un encomio a un modelo afastado completamente da economía circular ao basearse na incineración de residuos e nunha economía de escala que favorece a xeración de máis residuos, en contra dos obxectivos de minimización".

Os últimos datos publicados polo Miteco apoian estas medidas, xa que as verteduras galegas situáronse en 2018 nun 35%, unha cifra máis baixa que a media estatal, do 53%. A cara máis negativa preséntana as estatísticas de incineración. En 2018, Galicia foi a terceira comunidade autónoma que máis residuos incinerou --un 45% do total xerado--, só por detrás de Melilla e Baleares. A media estatal situouse no 11, 6%.

Con todo, hai unha idea común, unha declaración que se repetiu por parte de todos os actores que participan no novo proceder que pretende frear a pegada ambiental e mellorar a xestión de residuos: "A aposta pola sustentabilidade ambiental xa non é unha opción, como o puido ser nun pasado, agora é unha obrigación para coa nosa terra".

A UE presenta o seu Plan de Acción de Economía Circular con aspiracións ha crear unha economía máis sustentable.. COMISIÓN EUROPEA - Arquivo | Fonte: Europa Press