Por Europa Press / Redacción | A CORUÑA | 13/02/2021 | Actualizada ás 17:56
O Concello de Sada remitiu un comunicado no que celeba que a Audiencia Provincial da Coruña confirmase que o Pazo de Meirás é propiedade do Estado, "ratificando unha sentenza histórica conseguida desde Galicia," polo que supón o paso ao patrimonio público dun inmoble" conseguido coa represión do Estado fascista, a ditadura e o totalitarismo de Franco".
Con todo, o goberno local non comparte varias das consideracións contidas nos fundamentos da sentenza, e, moi especialmente, a declaración como "posuidores de boa fe" dos herdeiros do ditador e a consecuente incorporación ao fallo do deber de liquidación posesoria en tal condición, o que obriga a abonarlles non só gastos necesarios senón tamén os gastos útiles e, sobre todo, "a consolidar a favor do Franco todos os ingresos xerados polo Pazo e non compensalos na liquidación".
En virtude desta situación, o Concello lembra que os Franco quedan cos ingresos e o Estado "estaría a lles abonar os gastos desde 1975". O Concello de Sada considera que esta situación "non se axusta a dereito", dado que segundo recollía a sentenza do Xulgado, "a posesión dos herdeiros do ditador debe ser considerada como de mala fe".
"Considerar que eran descoñecedores ou ignorantes da posesión ilegal do Pazo e das condicións nas que Franco o adquiriu non é crible. Os Franco non poden resultar beneficiados da posesión dun ben detentado ilegalmente desde a súa orixe, apropiándose e consolidando os ingresos obtidos durante tantos anos. Franco actuou de mala fe e os seus herdeiros, tamén", esgrimiu o rexedor de Sada, Benito Portela.
O goberno local lembra que a sentenza da Audiencia "omite o feito" de que o ditame da comisión de expertos, no que fundamenta parte da súa decisión, contou cun Voto Particular do Concello de Sada, que, precisamente argumentaba a consideración posesoria como de mala fe.
En consecuencia, e aínda celebrando o fallo, o Concello de Sada recorrerá o apartado concreto relativo á liquidación do estado posesorio como de boa fe, e solicita expresamente que as outras partes (Estado, Xunta de Galicia, Deputación da Coruña e Concello da Coruña), en especial ao Estado como parte actora, formalicen tamén os seus recursos en tal sentido.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.