Os médicos dos centros penais reclaman facer PCR aos reclusos e o acceso á súa historia clínica electrónica

Os médicos dos centros penais galegos reclamaron á Consellería de Sanidade que lles permita realizar probas PCR aos reclusos e acceder á súa historia clínica electrónica, xa que a solicitude por escrito desta información, segundo advirten, carrexa atrasos no diagnóstico de "moitas" patoloxías.

Así figura nunha carta remitida polo Consello Galego de Colexios de Médicos ao conselleiro de Sanidade, Xullo García Comesaña, na que se recollen as demandas dos facultativos de instittuciones penais, que protestan pola imposibilidade de consultar a historia clínica dos seus pacientes.

Segundo explican, as analíticas, radiografías e demais probas médicas ás que se somete aos reclusos realízanse nos centros públicos do Sergas, aos que deben solicitar un informe por escrito para coñecer os resultados.

Así, denuncian que este proceso "atrasa" o diagnóstico e, ademais, implica que, á súa vez, o propio paciente teña que autorizar por escrito ao médico do centro hospitalario para que este envíe o informe ao facultativo de institucións penais.

Os profesionais cualifican este sistema de "bastante irregular", á vez que denuncian os atrasos que implica e que poden repercutir na saúde dos internos. Así mesmo, tamén demandan a Sanidade que autorice aos facultativos dos centros a realizar test PCR "como calquera médico de atención primaria" para velar polo control de posibles contagios de coronavirus nas penitenciarías.

"Cremos que son medidas que non supoñen gran custo económico, son facilmente implementables e redundaría nun mellor control da pandemia e nun mellor servizo por parte destes profesionais", pecha a misiva o Consello de colexios, asinada polo presidente da entidade, Isidro J. Lago Barreiro.

Prisión de Soto del Real. Ricardo Rubio - Europa Press - Arquivo