A compravenda de vivendas descende un 12,9% en 2020 en Galicia, a súa maior caída desde 2012
É case cinco puntos inferior á da media, pero a terceira maior entre as comunidades que se anotan baixadas
Por Europa Press / Redacción | Santiago de Compostela | 15/02/2021 | Actualizada ás 11:38
A compravenda de vivendas descendeu un 12,9% en 2020 en Galicia en relación co ano anterior, ata 14.907 operacións, co que se anotou a súa maior diminución desde 2012 (cando baixou un 13,52%), segundo os datos que publica este luns o Instituto Nacional de Estatística (INE).
O total de leiras transmitidas caeu un 7,3% na comunidade galega, ata 91.566. Mentres, no mes de decembro, a compravenda de vivendas subiu un 28,8% interanual, ata 1.564, e as operacións entre o global de leiras incrementáronse un 33,3% tamén respecto de decembro de 2019, con 8.724.
O retroceso do 12,9% interanual das compravendas de vivendas foi o terceiro maior por comunidades, por despois de Andalucía e País Vasco. Mentres, o incremento de decembro en variación interanual foi o segundo maior por autonomías, unicamente superado polo que rexistrou A Rioxa.
As 91.566 leiras transmitidas en Galicia no conxunto do ano repartíronse entre 33.212 rústicas e as restantes 58.354 urbanas: 30.934 vivendas, 2.108 solares e 25.312 doutro tipo. Ao lado das leiras urbanas, a distribución é a seguinte: 29.187 compravendas, 683 doazóns, 212 permutas, 12.309 herdanzas e 15.963 doutra clase.
DATOS ESTATAIS
No conxunto estatal, a compravenda de vivendas esborrallouse un 17,7% en 2020 con respecto ao ano anterior, ata un total de 415.748 operacións, rexistrando a súa maior caída en nove anos e a menor cifra de transaccións desde 2016.
