Feijóo anuncia que tamén vacinará en polideportivos, auditorios ou centros feirais "se hai vacinas"
A vacinación dos maiores de 80 anos será por orde alfabética comezando pola letra 'H'.
Por Europa Press / Redacción | SANTIAGO DE COMPOSTELA | 15/02/2021 | Actualizada ás 16:37
O presidente da Xunta avanzou a posibilidade de facer "algún axuste loxístico" e "concentrar" á poboación "en polideportivos, auditorios ou centros feirais", sobre todo "nas cidades os fins de semana".
No entanto, Feijóo condicionou este despregamento a que España, e por conseguinte Galicia, reciba un maior volume de vacinas que as actuais. E é que, segundo volveu a reivindicar, a capacidade do Sergas é de administrar 100.000 diarias. "O problema é que non temos nin 25.000 vacinas á semana e non temos nin 100.000 vacinas ao mes. Por tanto, aquilo que podemos facer nun día, temos que investir 30 días", lamentou.
Así, aproveitou para lanzar ao Ministerio de Sanidade a mensaxe de que "a orde de vacinación non pode irse improvisando cada semana" e a petición de maior "transparencia" nos criterios de repartición.
Neste sentido, aseverou que a Galicia, por porcentaxe de poboación de máis de 80 anos, correspóndenlle en torno ao 8,2 por cento das doses na fase actual: "Se non chegan, os primeiros que o imos a denunciar somos o Goberno de Galicia".
VACINACIÓN
O Servizo Galego de Saúde (Sergas) comezou este luns a chamar aos maiores de 80 anos para citalos a vacinarse a partir do próximo luns, 22 de febreiro. A administración das doses seguirá unha orde alfabética por apelidos, que se iniciará coa letra 'H'.
Así o avanzou este luns o presidente da Xunta, Alberto Núñez Feijóo, na rolda de prensa tras a reunión do comité clínico, na que explicou que o pasado venres un equipo da Consellería de Sanidade desprazouse ante un notario para levar a cabo o sorteo de letra.
"Empezaremos co primeiro apelido que teña a letra 'H' e así iremos secuenciando ata a 'Z' e logo a volver empezar pola 'A'. É o criterio máis obxectivo, máis limpo", asegurou o mandatario autonómico, quen lembrou que este foi o método a seguir para vacinar aos profesionais sanitarios.
Así, será a partir do próximo luns cando os anciáns de máis de 80 anos reciban as doses de Pzifer-BioNTech. En principio, a campaña desenvolverase nos centros sanitarios das sete cidades galegas e aqueles centros de saúde de cabeceira de cada comarca, un total de 400 puntos.
Iso si, Feijóo asegurou que, no caso de que unha persoa "non poida desprazarse" ata este punto, administraráselle a vacina "no centro de saúde máis próximo ao seu domicilio". "E, no caso de que tampouco iso sexa posible por razóns de mobilidade, iriamos ao domicilio de cada un deles", garantiu a continuación, á vez que xustificou este procedemento pola dispersión demográfica de Galicia, cuns 30.000 núcleos de poboación --o 50 por cento de todos os de España--.
