A nova senda peonil de Alba en Pontevedra elimina un "punto negro" do Camiño Portugués

A conselleira de Infraestruturas e Mobilidade, Ethel Vázquez, e o alcalde de Pontevedra, Miguel Anxo Fernández Lores, acompañados polo delegado da Xunta en Pontevedra, Luís López Diéguez, e polo concelleiro de Obras e Mobilidade, Demetrio Gómez Xunqueira, visitaron este martes a finalización das obras da senda peonil de Alba, que supón a eliminación dun "punto negro" do Camiño Portugués.

A senda atópase na PO-225 ao seu paso polo núcleo de San Caetano, na parroquia de Alba, no termo municipal de Pontevedra. A execución desta obra superou os 700.000 euros, que se destinaron á construción deste viario de 710 metros de lonxitude, unha pasarela metálica de 12 metros sobre o río Rons e o acondicionamento da praza no exterior da capela de San Caetano.

Durante a visita, Ethel Vázquez indicou que "estas obras son unha mellora substancial para os veciños, para os peregrinos e para os condutores que se achegan á zona do polígono", e incidiu en que "supoñen gañar espazo para as persoas e máis seguridade viaria".

Ademais, Vázquez Mourelle anunciou que na primavera se iniciarán as obras da senda na estrada PO-531 na Devesa, que se atopa en fase de contratación, cun investimento próximo aos 800.000 euros. Tamén aproveitou para lembrar que estas actuacións se enmarcan no Plan de sendas de Galicia, que na comarca de Pontevedra supoñen 11 quilómetros e un investimento de cinco millóns de euros.

PUNTO NEGRO

Pola súa banda, Miguel Anxo Fernández Lores manifestou "a satisfacción polo final desta obra, que era absolutamente necesaria e imprescindible", co obxecto de dar solución ao que denominou como "probablemente o punto negro máis importante que tiña o Camiño Portugués ao seu paso polo Concello de Pontevedra".

Neste sentido, o alcalde insistiu en que a obra "era dunha necesidade imperiosa" e lembrou que o itinerario "era absolutamente perigoso e a xente tiña que ir en ringleira, porque ademais esta vía ten moitísimo tráfico".

VARIANTE DE ALBA

Na visita, e a preguntas dos medios de comunicación, tamén se abordou o proxecto da variante de Alba e a posible transferencia da estrada PO-225 ao Concello. A este respecto, Fernández Lores explicou que, para o Consistorio, a actuación neste tramo consta de "tres patas": mellorar o itinerario do Camiño Portugués a Santiago, reducir a velocidade no viario e buscar unha alternativa ao tráfico a través da variante de Alba.

"Cando se faga un viario operativo para o tráfico, que sería a variante de Alba, poderíase recibir esta estrada como municipal", apuntou. Sobre o proxecto da variante de Alba, afirmou ter "esperanzas de chegar a acordo" do mesmo xeito que ocorreu con Montecelo ou coa estación intermodal, e reiterou na necesidade de "buscar unha alternativa" para conectar a parroquia de Campañó coas de Alba e Lérez.