Por Galicia Confidencial | Compostela | 18/02/2021 | Actualizada ás 14:36
A Xunta quere que o Goberno central dea xa pasos decisivos para bonificar aos usuarios da AP-9. A pesar de que Madrid anunciou xa 50 millóns de euros para aliviar as custosas peaxes da Autoestrada do Atlántico, o certo é que o Goberno galego di que “aínda non se viron nada deses millóns”. Por iso, propón que pase á acción e aplique bonificacións a turismos e vehículos de transporte.
Neste sentido ten duas propostas concretas; a gratuidade da viaxe de volta para todos os vehículos lixeiros en calquera día da semana e un desconto do 60% de ida e volta para os vehículos pesados. No primeiro dos casos tamén aposta por un desconto do 25% nas viaxes de ida se se producen nun intervalo de 24 horas e de luns a sábado. Sobre a segunda das bonificacións di que vai destinado ao transporte de mercadorías para “desonxestionar as estradas convencionais e garantir a seguridade no tráfico”.
“A evolucion das peaxes en Galicia é un agravio e xa levamos tempo solicitando a rebaixa das peaxes”, dixo o vicepresidente da Xunta, Alfonso Rueda, na rolda de prensa posterior ao Consello da Xunta. “O que pedimos é que se cumpra o prometido con Rajoy, que se libere a peaxe de Redondela e se apliquen esas bonificacións comprometidas”, apuntou.
Sobre este plan de bonificación dixo que é “moi meditado pero estas dúas medidas son as que poden ter máis alcance”. “É unha proposta sólida e eficaz e está amparada en cifras”, indicou ao tempo que apuntou que tamén pedirán ao Goberno central que deixe sen efecto as subas estraordinarias de Audasa polas obras de ampliación en Rande.
“A nosa proposta nace ante a inactividade do Goberno central xa que se non aplica eses 50 millóns anunciados de nada vale. É cuestión de vontade. Se houbera vontade pois isto se poderíase aplicar de xeito moi rápido”, concluíu.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.