Cartas e mails de agradecemento, o plan do Sergas para recoñecer aos sanitarios un ano despois da pandemia
Destina medio millón de euros para o benestar emocional de todo o persoal cun programa que recolle a instalacións nos hospitais de caixas de correos para recibir felicitacións.
Por Galicia Confidencial | Santiago de Compostela | 18/02/2021 | Actualizada ás 20:45
O conselleiro de Sanidade, Julio García Comesaña, presentou este xoves, no Consello da Xunta, o Plan de intervención psicosocial para o apoio e a atención ao persoal do Sergas na pandemia da covid. Este plan, segundo dixo, ten por obxecto dar un recoñecemento explícito ao persoal sanitario e dar, tamén, “unha resposta unificada en todas as áreas para previr e minimizar as repercusións sobre a saúde e o benestar emocional dos 44.000 profesionais que traballan nas institucións sanitarias do Sergas durante a crise sanitaria”.
Con este obxectivo, o Plan inclúe distintas liñas de actuación e estratexias de intervención. As estratexias realizaranse cun programa de acompañamento e apoio psicolóxico a profesionais “Cóidate para coidar“, que contará, como mínimo en cada area sanitaria, cun profesional da psicoloxía clínica específico para profesionais, e co apoio de psiquiatra e dos servizos de prevención de riscos laborais para impulsar este programa.
CAIXAS DE CORREO E EMAILS
“Resulta necesario e de xustiza manifestar, potenciar e soster o recoñecemento ao traballo e dedicación de todo o persoal durante a pandemia”, apunta a Xunta. Nesta liña, prevense accións para facilitar á cidadanía a transmisión do seu agradecemento baixo o lema #grazasxtanto. Os centros sanitarios disporán de caixas de correo físicas en lugares visibles para que os pacientes poidan escribir aos profesionais, e estes visibilizar, de forma tanxible, o recoñecemento da cidadanía.
Así, tamén, haberá contas de correo electrónico, entre outras iniciativas de participación cidadá. Tamén se incidirá na “escoita activa” como organización. Para iso, segundo o Sergas, “estableceranse canles claras e eficaces de comunicación interna e participación para incrementar o coñecemento sobre a situación da pandemia e as accións que se están a levar a cabo para o seu control (vacinación, cribados, datos epidemiolóxicos, actualizacións de protocolos e procedementos de traballo, etc.), fomentando, tamén, a súa participación na toma de decisións”.
CONTROL EMOCIONAL
De xeito simultáneo a estas medidas, elaboraranse pautas e accións formativas relacionadas co autocoidado emocional. O día 2 de marzo comezarán estas accións que estarán á disposición de todo o persoal por vía telemática, contando coa presenza de Alejandra Vallejo-Nagéra, psicóloga e experta en xestión do estrés, ansiedade e mindfulness. Tamén está prevista, o mes seguinte, a colaboración de Rafael Santandreu, psicólogo, terapeuta e comunicador no ámbito do benestar emocional.
Para levar a cabo este programa, está previsto un orzamento de máis de medio millón de euros, a maior parte do cal, 445.997 euros, vai destinado á incorporación de persoal psicólogo clínico en cada unha das áreas sanitarias no ano 2021, dentro do Plan de Saúde Mental poscovid 2020-2024. Así como de accións estratéxicas de formación, caixas de correo, paneis e diverso material de difusión.
