Galicia non detecta ningún caso de gripe, fronte aos 38 mortos e 1.197 ingresos de hai un ano
En toda España, a tempada de gripe rexistra sete deteccións, fronte a 6.927 o ano pasado.
Por Europa Press / Redacción | Santiago de Compostela | 18/02/2021 | Actualizada ás 18:57
O Sistema de Vixilancia de Gripe en España (SVGE), constituído por epidemiólogos e virólogos das comunidades autónomas, o Centro Nacional de Epidemiología (CNE) e o Centro Nacional de Microbiología (CNM) do Instituto de Salud Carlos III (ISCIII), detectou, ata o 14 de febreiro, apenas sete virus da gripe na tempada 2020-2021 en toda España.
No caso de Galicia, os informes indican que, ata mediados de febreiro, non se deu ningún enfermo desta doenza, tal e como presaxiaba a ausencia de incidencia de semanas anteriores. Nas mesmas datas do ano anterior, a gripe xa producira en Galicia 38 mortes e 1.197 ingresos.
A nivel estatal, o ano pasado por estas datas notificáronse 1.757 deteccións sentinela (realizadas pola rede de médicos encargada de notificar os casos) de virus gripais. A estes hai que sumar 5.170 non sentinela. É dicir, 6.927 en total.
A Organización Mundial da Saúde (OMS) sinala no seu informe semanal que os actuais datos de vixilancia da gripe deben interpretarse con cautela, xa que a pandemia de COVID-19 "influíu nos comportamentos para solicitar asistencia médica, a dotación de persoal/rutinas nos sitios sentinela, así como as prioridades e a capacidade da realización de probas nos Estados Membros".
