Comesaña recoñece que as UCI aínda preocupan e recomenda "ser prudentes" sobre os datos destas unidades

O conselleiro de Sanidade, Julio García Comesaña, trasladou este venres aos medios de comunicación, durante a súa visita a Ribadavia, que a situación epidemiolóxica das áreas sanitarias mellora "aos poucos", aínda que "nunha máis que noutras" e aínda preocupa a UCI, polo que instou de momento a "ser prudentes".

Así, o conselleiro destacou os resultados obtidos polas medidas restritivas impostas en toda a Comunidade Autónoma, aínda que recoñeceu que segue habendo "preocupación" en canto as unidades de críticos dos hospitais, polo que "a mensaxe segue sendo de prudencia". A pesar disto, asegurou que "a maior parte" dos casos están nos domicilios e, por tanto, controlados pola atención primaria.

Sobre as medidas restritivas e en vista dunha posible modificación a próxima semana, aseverou que, polo momento, "hai que seguir vixiando a tendencia cos seus parámetros obxectivos e a taxa de positivos, pero tamén outros máis subxectivos como a propia saturación das áreas". Neste último caso, dixo que "agora mesmo preocupan as áreas de críticos, a pesar de que melloran día, xa a día onte --por este xoves-- estaban nos valores do pico máximo da primeira onda".

Aínda que a situación non sexa a mesma "en todas as áreas", García Comesaña apostou por "ser prudentes", xa que, recoñeceu, o vindeiro luns "pode haber unha mellora que faga tomar unhas medidas ou pode empeorar a situación e que as medidas que haxa que aplicar sexan outras, pero sexan cales sexan, serán graduais".

VACINACIÓN

Noutra orde de cousas, o conselleiro lembrou que xa comezou a vacinación do persoal dos centros de día e do Servizo de Axuda no Fogar, que "están na primeira liña", ademais do proceso no grupo de maiores de 80 anos, que arrinca de forma piloto en Santiago este venres e comezará na área sanitaria de Ourense o luns.

Comesaña agradeceu "o bo traballo" realizado por todo o equipo de citación especial, "máis aló da área sanitaria de Ourense e mesmo de Galicia", asegurando que está formado por traballadores de atención primaria que "deron un paso adiante" para xestionar de forma voluntaria este labor.

Neste sentido, tamén citou como "referente e exemplo" ao persoal de enfermaría, aseverando que "é un corpo de elite" no que se apoiou o proceso de vacinación e que mostraron "entusiasmo e aposta pola atención primaria". "Estes meses foron moi intensos e o seu traballo e dedicación foron os que fixeron posible que Galicia teña un gran ritmo en canto ao proceso de vacinación e que estea a protexer con tanta rapidez á súa poboación máis vulnerable", sentenciou.

En canto á citación de maiores de 80 anos, explicou que "a resposta é maioritariamente de aceptar con entusiasmo". A principal opción, dixo o conselleiro, será vacinar nos centros de saúde, para evitar os desprazamentos innecesarios ata os hospitais, aínda que se habilitarán medios para os que non poidan desprazarse alí.

Ademais, destacou "o paso adiante" que asumiu todo o equipo administrativo das distintas áreas sanitarias para poder levar a cabo os chamamentos ás convocatorias de vacinación. "Son xente que coñece perfectamente estes sistemas e que está moi adoitada falar cos pacientes e a tratar con eles vía telefónica", afirmou.

Finalmente, recoñeceu que "pode" que haxa datos de contactos desactualizados nos centros de saúde ou que "co paso dos anos xente que cambiou de coidador", polo que a algunhas persoas "levará máis tempo localizalas" pero "poranse todas as ferramentas dispoñibles para iso".

Neste sentido, pediu que "ninguén se preocupe", porque "se logrará e serán vacinados". En todo caso, pediu ás persoas que crean que os seus datos están desactualizados, actualícenos nos seus centros de saúde para facilitar a tarefa.

O conselleiro de Sanidade, Julio García Comesaña | Fonte: Xunta de Galicia.