Denuncian eleccións "ilegais" no sindicato de ambulancias: "marcharon correndo coa acta"
FS-TES suma novas sombras ás acusacións que penden sobre as empresas concesionarias de ambulancias, financiadas con fondos públicos e criticadas por supostos "despidos ilegais" e incumprimentos do convenio.
- Denuncian "despedimentos encubertos" nunha concesionaria de ambulancias do 061
- Denuncian que hai 4 técnicos de ambulancias en corentena por non levar material protector
Por Galicia Confidencial | SANTIAGO DE COMPOSTELA | 26/02/2021 | Actualizada ás 21:30
Cae o foco sobre as empresas de ambulancias galegas. Logo de varias denuncias sobre a escasa dotación de material sanitario, a tensión entre traballadores e empresas concesionarias do servizo de ambulancias estalou o pasado xoves 25. A ruptura deixouse ver nunha mobilización convocada pola CIG en Barbanza na que foron denunciados os “despedimentos encubertos” que, supostamente, tería levado cabo a empresa Coexam S.L., concesionaria do servizo do 061 na área.
O problema é que, segundo destaca o Sindicato de Técnicos en Emerxencias Sanitarias (FS-TES Galicia) o caso dos despedimentos do Barbanza non foi un suceso illado. Na formación relatan un acontecemento paralelo que tivo lugar o pasado mes de decembro en Ourense. De acordo con esta fonte, producíronse “dous despidos disciplinarios” que “curiosamente se fixeron trala reclamación de dereitos laborais ante a empresa”.
Segundo apuntan dende o sindicato, dende hai anos teñen problemas para que as empresas en cuestión cumpran os “dereitos básicos” do convenio que rexe ao sector. Entre estes dereitos recollen o “simple rexistro horario, coñecer a xornada laboral, vacacións asinadas en tempo”, etc. Dende a formación recordan que estas empresas supostamente incumpridoras “reciben diñeiro público para cubrir todos eses gastos”.
ELECCIÓNS SINDICAIS "ILEGAIS"
Á problemática de Ourense súmase outro episodio que os representantes de FS-TES ven como unha “humillación” que tería relación cunha suposta vulneración de dereitos sindicais. A plataforma relata o intento dunha das concesionarias de ambulancias para descabezar de forma irregular a súa representación sindical lanzando unhas eleccións “ilegais” no momento en que os representantes legais dos traballadores non venceran aínda o seu tempo de permanencia no cargo.
“A empresa e o sindicato alí presente decidiron facer un teatro esperpéntico”, explican, “chegando incluso a querer marchar coa acta asinada pero en blanco” e “correndo, literalmente, con ela”. Deste proceso, que aseguran culminou cunha “destrución de papeletas”, vén de saír un novo representante sindical do que o FS-TES desconfía: “non pinta que vaia a defender de primeira entrada aos traballadores, xa que na arbitraxe defendeu á empresa”, explica.
