O PP acusa o Goberno central de "discriminar" a Galicia na repartición de vacinas

O secretario xeral do PPdeG, Miguel Tellado, volveu lamentar este venres que o Goberno "estea a discriminar" a Galicia coa repartición de vacinas e reclama, fronte a "consideracións políticas", que este se faga con criterios "transparentes" e "obxectivos".

O número dous dos populares galegos lamentou que Galicia reciba unhas "15.000 vacinas menos" que o que lle correspondería para cubrir aos maiores de 80 anos.

E é que aquí chegaron esta semana en torno ao 5 por cento das doses repartidas ás comunidades autónomas, cando a súa poboación de máis de 80 supón o 8,7 por cento de toda a do Estado.

Tal e como asegurou Tellado, é algo que tanto o PPdeG como a Xunta leva xa "semanas" denunciando o que consideran unha "discriminación" a Galicia.

Non en balde, o secretario xeral defendeu a capacidade do Servizo Galego de Saúde (Sergas) e os seus profesionais para pór unhas "100.000 vacinas diarias" no caso de que "o Goberno de España" as enviase.