Unha caravana convocada polo BNG para reclamar o fin da "estafa" da AP-9
Néstor Rego avisa de máis mobilizacións fronte a un Goberno que "non cumpre".
Por Europa Press / Redacción | A Coruña | 28/02/2021 | Actualizada ás 16:19
Decenas de coches responderon á chamada do BNG para marchar este domingo en caravana pola cidade da Coruña e reclamar o fin da "estafa legalizada" da AP-9. Con estas mobilizacións, os nacionalistas buscan que se materialice unha rebaixa de peaxes que o Goberno de España "non está a cumprir".
Así o explicou o deputado do Bloque no Congreso, Néstor Rego, ao finalizar a protesta en compañía da parlamentaria autonómica Mercedes Queixas e o portavoz municipal da formación, Francisco Jorquera.
A caravana partiu desde o Campus universitario de Elviña e percorreu rúas simbólicas da cidade herculina como Alfonso Molina e Catro Camiños, ata chegar á sede da Delegación do Goberno, situada en Praza de Ourense. A mobilización está enmarcada na campaña 'Basta de aldraxe a Galiza', que os nacionalistas prevén facer chegar a diferentes localidades.
Tras a protesta, o deputado no Congreso lembrou que "non hai ningunha razón" para demorar as prometidas rebaixas agora que os Orzamentos Xerais do Estado en vigor dispoñen dunha partida de máis de 50 millóns para ese efecto.
Trátase dunha cuestión que, segundo reivindicou Rego, "o BNG conseguiu no acordo de investidura" asinado cos socialistas. Este permitiu "introducir a necesidade de, por primeira vez en 40 anos, baixar as peaxes da AP-9".
Así mesmo, Rego afeou que, mentres o pasado 1 de xaneiro as peaxes volveron subir, o Estado "privilexia investimentos no eixo mediterráneo" e "todas as autoestradas da xeración da AP-9 empezan a ser gratuítas".
