Sanxenxo retira as parcelas na praia de Silgar polo avance da vacinación de cara o verán
O material utilizado --un centenar de estacas e varios metros de corda-- será empregado, como o do resto de praias, para a protección de dunas e para a demarcación de carreiros.
Por E.P. | PONTEVEDRA | 01/03/2021 | Actualizada ás 18:30
O Concello de Sanxenxo considera que este verán o proceso de vacinación contra a covid-19 estará "xa moi avanzado", polo que "non será necesaria" a utilización das parcelas de separación na praia de Silgar.
Así, na mañá deste luns a empresa instaladora comezou a retirar as cordas e estacas que conformaban as cuadrículas. O de Silgar era o único areal de Sanxenxo que aínda mantiña esta sinalización desde setembro "como símbolo de seguridade sanitaria no municipio", segundo explica o Concello nun comunicado.
O material utilizado --un centenar de estacas e varios metros de corda-- será empregado, como o do resto de praias, para a protección de dunas e para a demarcación de carreiros.
A pesar da confianza en que o proceso de vacinación estea "moi avanzado" e no verán a situación sanitaria mellore "considerablemente", o Concello asegura que tanto Silgar como o resto de areais de Sanxenxo darán "un novo salto cualitativo" en canto aos servizos e as medidas de seguridade.
Neste sentido, o Consistorio garante que a limpeza dos baños das praias "manterase coa mesma intensidade que o verán pasado", cada hora e media, e que o control por parte da empresa encargada será "exhaustivo".
