O PPdeG acusa o Goberno de "botar" á industria de España e "non buscar solucións" para Ence e Alu Ibérica

O secretario xeral do PPdeG, Miguel Tellado, acusou ao Goberno de "botar" de España ao sector industrial e de "non buscar solucións" para a situación das plantas de Ence e Alu Ibérica, situadas en Pontevedra e A Coruña, respectivamente.

Nunha rolda de prensa celebrada en Santiago este venres, reprobou que Galicia sexa "vítima" das "políticas caóticas e contraditorias" do Executivo que preside Pedro Sánchez. De feito, afirmou que estas "non atenden a ningunha estratexia industrial" e só se rixan polas "imposicións ideolóxicas" dun goberno que "está a destruír o presente e o futuro" do tecido produtivo galego. Deste xeito, criticou que "se negue a tomar as medidas necesarias" e "non busque solucións" para que as empresas "non fuxan de España".

"Primeiro foi Alcoa en San Cibrao, despois veu Siemens-Gamesa e agora vemos como seguen o mesmo camiño Ence en Pontevedra e Alu Ibérica na Coruña", lamentou Tellado, quen denunciou que "estas empresas non se están indo de España", senón que o Goberno central "as bota dun país que supera os 4 millóns de parados e ten 1 millón de traballadores en ERTE".

Nesta liña, sinalou que o Executivo central "dedícase a pechar industrias e a fomentar a deslocalización de empresas" a pesar da situación económica. "A suposta política de Transición Ecolóxica deste Goberno, nin é ecolóxica nin aposta por ningún tipo de transición", resolveu.

Ademais, advertiu de que un hipotético abandono de Pontevedra por parte de Ence colocaría nunha situación "dramática" a 5.000 familias e incidiu en que a súa permanencia na cidade "depende da vontade do Goberno", que "só debe facer un pequeno cambio no articulado" do regulamento de Costas.