Yolanda Díaz admite que os ERTE son "insuficientes" e defende as "axudas directas" para empresas
A ministra de Traballo reivindica a xestión de PSOE e UP fronte á "austeridade" do PP de Rajoy, que deixou "dor e sufrimento"
Por E.P. | SANTIAGO DE COMPOSTELA | 07/03/2021 | Actualizada ás 16:57
A ministra de Traballo e Economía Social, Yolanda Díaz, non dubidou en cualificar de "malos" e "dramáticos" os datos do paro de febreiro coñecidos esta mesma semana, á vez que recoñeceu que os expedientes reguladores temporais de emprego (ERTE), aínda que son unha "ferramenta fundamental", "non son suficientes".
Neste contexto, nunha entrevista concedida este domingo ao circuíto galego de Radio Nacional (RNE), recollida por Europa Press, defendeu que as empresas precisan axudas directas, nas que xa traballa o Goberno, "para pegar un último empuxón" para os meses "durísimos" que veñen.
Non en balde, Díaz quixo defender a resposta ofrecida desde o Executivo do que forma parte fronte á "austeridade" practicada polo PP de Mariano Rajoy tras a crise financeira do 2008. Para a ministra de Traballo, o Goberno de PSOE e Unidas Podemos "demostra que se poden facer as cousas doutra forma e que aquelas receitas eran malas non só para a vida das persoas, senón tamén para a economía".
"As receitas de austeridade do PP foron dor e sufrimento, e fixeron que o noso país tardase 10 anos en saír da crise financeira cando outros países saíron rapidamente", explicou.
E é que, segundo explicou, en lugar dos "despedimentos masivos" impulsados polos populares, o actual Goberno despregou "como nunca" o mecanismo dos ERTE para facer fronte ao parón económico que supuxo a pandemia da covid-19.
DEFENDE MEDIDAS DO GOBERNO
Así, a ministra diferenciou a situación do 2013, cunha taxa de paro do 27% e o desemprego xuvenil no 56%, da actual, co paro xeral no 16% e no 40% entre os mozos. Ademais, Díaz destacou que o Goberno o que fixo foi "conter" esta situación cos ERTE "e salvar máis de 550.000 empresas e máis de 3,6 millóns de postos de traballo".
Xunto a isto, mencionou outras medidas como o ingreso mínimo vital, o plan 'Cóidame', os subsidios para traballadoras do fogar e o acceso á prestación por desemprego para as persoas que xa non cumprisen os requisitos.
Dito isto, a ministra de Traballo mostrouse consciente de que "a precariedade" do mercado laboral tanto español como galego "é insoportable", porque o mecanismo dos ERTE non foi "capaz de soster" os postos de traballo perdidos, que son "de semanas e de días".
Neste contexto, Díaz reiterou que os ERTE son unha "ferramenta fundamental" pero non "suficiente". "Necesitamos máis", engadiu, para seguidamente avanzar que o Goberno de España xa traballa no desenvolvemento de axudas directas.
SITUACIÓN DE FERROLTERRA
A ministra de Traballo tamén lamentou, durante a entrevista en RNE, a situación pola que atravesa a industria en Ferrolterra, de onde é orixinaria. Precisamente, na comarca hai convocada para o mércores unha folga xeral. "Comprendo moi ben que se manifesten", dixo respecto diso, para seguidamente achacar esta crise á deslocalización, unha práctica que en España aínda "non ten lexislada" como outros.
Como exemplo puxo a planta de Siemens Gamesa, nas Somozas, e considera que é "inconcibible" o seu peche ante o "potencial enorme" de Galicia en enerxía eólica. Así, ante un escenario de transición enerxética e de descarbonización, Díaz manifestou: "Gustaríame que, da man da Xunta, se desenvolan uns modelos industriais que poidan cambiar o rostro do noso país".
