Galicia experimentou unha perda de case o 9% de mulleres autónomas durante a última década
Organizacións do sector comentan que as autónomas "aínda teñen moito camiño por percorrer xunto á sociedade para lograr unha igualdade real cos homes".
Por E.P. | Santiago de Compostela | 08/03/2021 | Actualizada ás 16:52
Con motivo da celebración do Día da Muller, a Asociación de Traballadores Autónomos de Galicia (ATA Galicia) publicou o 'Informe muller autónoma 2020', no que indica que a galega é a comunidade autónoma que máis traballadoras autónomas perdeu durante os últimos 10 anos de toda España, un 8,6%, a pesar de ser na que o emprego autónomo feminino ten máis peso, un 41%.
"Galicia é a única comunidade autónoma, xunto con Asturias, onde a perda entre o colectivo feminino foi superior á dos homes", sinalou ATA Galicia nun comunicado. Fronte á caida do 8,6% das mulleres, o descenso entre os homes autónomos foi do 3,7%. O informe establece comparacións tamén a nivel nacional e sinala que, en toda España, o crecemento das mulleres autónomas na última década foi da 11,5% fronte ao 2,4% dos homes, "todo o contrario" ao ocorrido en Galicia.
En canto ao ano 2020, o informe sinala que Galicia "volve a desligarse do esquema rexistrado a nivel nacional --con 2.113 autónomos máis-- e apunta un descenso de 238 autónomos homes, o que supón un descenso do 0,2%". Este descenso é aínda máis acusado, recalcou a asociación, no colectivo feminino, onde se perderon 1.146 autónomas, unha baixada do 1,3%.
ATA Galicia realiza tamén no informe "unha radiografía do mercado laboral en Galicia", de cuxos resultados desprenden que a porcentaxe de mulleres en activo é practicamente dez puntos inferior á dos homes en Galicia --48,1% de mulleres respecto ao 56,9% de homes-- e que a taxa de paro sitúase no 13,2% entre a traballadoras fronte ao 10,3% dos traballadores.
A este respecto, o presidente de ATA Galicia, Rafael Granado, denunciou que, aínda que nesta situación "o acceso ao emprego nunca é sinxelo, a muller galega non atopa maiores facilidades". "Consideramos importante que se priorice en políticas específicas que apoien o emprendimiento e a consolidación do autoemprego feminino", demandou Granados.
GALICIA É A CUARTA COMUNIDADE QUE SUMOU MÁIS EMPRENDEDORAS EN 2020
Pola súa banda, a Asociación de Autónomos e Pequenas Empresas de Galicia (APE Galicia), que comparte os datos do informe publicado por ATA Galicia, comentou que as autónomas, "que aínda teñen moito camiño por percorrer xunto á sociedade para lograr unha igualdade real cos homes", necesitan "máis que nunca" o apoio de todas as institucións e axentes sociais "para poder resistir".
"Xuntas somos máis fortes", indicou nun comunicado APE Galicia, un sentimento compartido pola Cámara de Comercio da Coruña que, a través do Programa de Apoio Empresarial ás Mulleres (PAEM), rexistrou o pasado ano 167 usuarias e axudou a case 60 emprendedoras a montar o seu propio negocio.
Segundo apuntou a Cámara, "estes datos sitúan a Galicia como a cuarta comunidade con mellores resultados (un 10% do total), sendo A Coruña a provincia na que máis empresas se crearon" no marco dun programa que, tal e como definiu a propia asociación, "está pensado para aquelas que teñan unha idea ou proxecto de negocio, un plan de modernización ou ampliación e que busquen establecer sinerxías con outras empresarias". O programa conta ademais co apoio financeiro do Fondo Social Europeo, do Instituto da Muller e para a Igualdade de Oportunidades do Ministerio de Sanidade, entre outras institucións.
SÓ O 35% DE ESTUDANTES DE CARREIRAS STEM SON MULLERES
O Consello Superior dos Colexios de Arquitectos de España aproveitou tamén o 8 de marzo para publicar un estudo de xénero que, tal e como sinalou a asociación, "revela unha brecha salarial do 19% entre arquitectos e arquitectas". O documento sinala que a porcentaxe de arquitectas colexiadas que traballa por conta propia é do 62,1%, "11 puntos menos que o dos homes".
O Consello subliñou tamén que "máis do 50% das arquitectas colexiadas cren que no sector da arquitectura existen desigualdades por cuestión de xénero que dificultan o desenvolvemento profesional", unhas diferenzas "en liña coas existentes na sociedade".
"Este avance do estudo de xénero móstranos que queda moito traballo por facer, pero tamén que camiñamos na boa dirección", explicou a portavoz da Comisión de Xénero do CSCAE, María José Peñalver, que destacou ademais que unha das probas deste bo rumbo é que "a paridade entre mulleres e homes nas aulas das escolas de arquitectura é unha realidade a día de hoxe".
Aínda que os estereotipos parezan eliminados das aulas de arquitectura, o Colexio Profesional de Enxeñaría en Informática de Galicia denunciou este luns mediante o seu presidente, Fernando Suárez, que "só o 35% dos estudantes matriculados en carreiras STEM --ciencia, tecnoloxía, enxeñaría e matemáticas-- son mulleres, e só o 3% delas escollen estudos no ámbito do TIC".
Concretamente, a profesión de Enxeñaría en Informática en Galicia, apuntou o colexio, "está aínda moi masculinizada", con apenas un 17% de mulleres. "É necesario borrar os estereotipos de xénero nas profesións STEM e dar visibilidade á importancia que as mulleres teñen na industria e a universidade", reclamou a asociación nun comunicado.
