A Xunta abre este mes en Londres unha oficina para asesorar a empresas galegas ante o Brexit
Por E.P. | SANTIAGO DE COMPOSTELA | 08/03/2021 | Actualizada ás 18:26
O Goberno galego pon en marcha este mes unha oficina en Londres para asesorar a empresas galega ante os retos do Brexit. Nun seminario organizado pola Confederación de Empresarios de Pontevedra (CEP) en Vigo, o vicepresidente económico, Francisco Conde, destaca que esta oficina achegará información e axudas para manter a posición das empresas galegas no Reino Unido.
Lembra que este país é o cuarto destino das vendas ao exterior de Galicia, que logrou no 2020 o segundo mellor saldo comercial de España. A Oficina Brexit, posta en marcha a través do Igape, tamén contempla apoios como o Cheque Brexit, para cubrir servizos de consultoría, que se poden solicitar ata o 17 de maio cun orzamento dun millón de euros.
Ademais, activouse unha plataforma de autodiagnóstico que permite ás empresas coñecer de forma personalizada o impacto do Brexit no seu día a día para poder anticiparse e adoptar as medidas oportunas. Ata o momento, 130 empresas galegas xa empregaron esta ferramenta, entre as que se identifica un nivel de exposición medio, o 43% da provincia de Pontevedra.
Esta plataforma complementa o servizo de atención permanente Brexit Igape Responde, que ofrece unha atención personalizada ás compañías galegas.
