Calvos de Randín volve rexistrar a temperatura máis baixa de toda Galicia

O frío regresou á provincia de Ourense. Tras unhas xornadas nas que se notaba o ambiente primaveral, a pasada madrugada os termómetros volveron a alcanzar cifras negativas. O municipio ourensán de Calvos de Randín rexistrou a mínima de Galicia con 6,8 graos baixo cero.

Os valores negativos estiveron presentes en boa parte do territorio provincial, incluída a capital, a terceira cidade galega chegou a -1 grao centígrado, segundo recollen os datos de Meteogalicia. Con todo, a menor cifra foi para un dos pobos clásicos nesta situación, Calvos de Randin, onde o termómetro descendeu ata os -6,8 graos ás 6,00 horas da madrugada.

No resto de Ourense, as cifras máis baixas alcanzáronas Xares, no municipio da Veiga, con -5,7 graos; e na cabeza de Manzaneda con -5,6. Nas vilas de maior poboación, rozaron os menos -4º, tanto en Verín como en Xinzo de Limia, onde se chegou a -4,2º ao longo da madrugada.

Pedrafita do Cebreiro, en Lugo, foi o único municipio de fóra da provincia de Ourense cunha das temperaturas mínimas da noite, segundo Meteogalicia. Alí chegouse aos -5 graos centígrados.

Para o resto da semana, Meteogalicia prevé unhas temperaturas máis primaverais e o regreso das precipitacións a partir deste xoves.