A Xunta esixe coñecer as axudas que o Goberno destinará ao Xacobeo
O vicepresidente primeiro, Alfonso Rueda, lembrou que a posibilidade que teñen os concellos de adherirse á plataforma da Xunta para o pago de axudas directas aos hostaleiros permitirá adiantar o diñeiro antes de que o liberen os propios consistorios.
Por E.P. | SANTIAGO DE COMPOSTELA | 10/03/2021 | Actualizada ás 19:25
A Xunta de Galicia esixirá ao Goberno central que aclare nun documento os prazos e orzamentos cos que o Estado contribuirá á celebración do Xacobeo. Así o sinalou o vicepresidente primeiro do Goberno galego, Alfonso Rueda, en resposta a unha pregunta formulada polo deputado do PPdeG Borja Verea no pleno do Parlamento de Galicia.
Na súa intervención, Rueda lembrou que o secretario de Estado de Turismo, Fernando Valdés, comprometeuse esta semana a elaborar un Plan Nacional do Xacobeo. Con todo, subliñou que, se non se ampliara o Ano Santo ao 2022, esta participación chegaría tarde, xa que o Goberno central apraza a súa presentación ata o verán.
O vicepresidente primeiro da Xunta lembrou que o Parlamento de Galicia xa reclamou o pasado 23 de decembro un compromiso real do Goberno central con partidas concretas para colaborar na organización do Xacobeo, unha proposición non de lei na que o Grupo Socialista decidiu absterse.
Rueda asegurou esperar que nesta ocasión o Executivo cumpra os seus compromisos, tendo en conta que ata agora non houbo máis que declaracións de intencións, fronte a outros eventos anunciados noutras comunidades autónomas que si contan con partidas concretas do Estado. "Ímoslle a dar un voto de confianza", dixo Rueda en relación ao compromiso adquirido esta semana polo secretario de Estado de Turismo.
Ademais, aproveitou para lembrar que a Xunta investirá 85,8 millóns no Xacobeo 2021, un orzamento que destinará a garantir a seguridade para peregrinos e turistas, a mellorar as infraestruturas e a paisaxe, á promoción do evento e á súa programación.
Con todo, incidiu en que para todo iso necesítase a colaboración do Estado, e máis tendo en conta que se trata dun acontecemento internacional que vai máis aló das fronteiras de Galicia, e que a extensión do Ano Santo ao 2022 permitirá multiplicar o efecto dinamizador do fenómeno xacobeo.
AXUDAS AOS HOSTALEIROS
Na sesión plenaria, tamén se referiu ao segundo plan de rescate para as empresas máis castigadas pola pandemia. En concreto, lembrou que a posibilidade que teñen os concellos de adherirse á plataforma da Xunta para o pago de axudas directas aos hostaleiros permitirá adiantar o diñeiro antes de que o liberen os propios consistorios, en liña co compromiso de que esa inxección de liquidez chegue aos seus beneficiarios de forma áxil e sen burocracia.
Ademais, en resposta a outra pregunta formulada polo deputado popular Alberto Pazos, Rueda sinalou que a Xunta recibiu xa preto de 38.000 solicitudes por parte do sector, e puxo a disposición de autónomos, microempresas e hostaleiros un total de 160 millóns de euros en catro meses. Ademais, apuntou que a intención da Administración autonómica é facer os pagos ao longo do mes de marzo.
Fronte a iso, censurou que "nada se saiba das axudas estatais e dos 11.000 millóns comprometidos polo presidente do Goberno", que "seguen sen concretarse mentres o Executivo central continua leado en pelexas internas".
