Evitan que unha muller se precipite ao río desde a Ponte do Milenium en Ourense
Foi atendida de inmediato polos servizos sanitarios, que a trasladaron ao Complexo Hospitalario Universitario de Ourense (CHUO).
Por E.P. | SANTIAGO DE COMPOSTELA | 16/03/2021 | Actualizada ás 17:03
Axentes da Policía Local de Ourense evitaron, xunto a uns viandantes, que unha muller "moi alterada" se precipitase ao Río Miño desde a Ponte do Milenium na tarde deste pasado luns. Segundo relatou a Policía Local, os feitos sucederon sobre as 16,51 horas a Xefatura da Policía Local recibiu un aviso de que unha persoa se tentaba "tirar ao río desde a Ponte do Milenium".
Ao lugar trasládanse dúas patrullas. A primeira ao chegar observou a dúas persoas que suxeitaban a unha muller, de 54 anos e veciña de Ourense, nunha das varandas da ponte, coas que colaboraron porque "estaba moi alterada".
Deste xeito, explicaron as mesmas fontes, evitaron que accedese á varanda, aínda que momentos antes, segundo o relato desas dúas persoas que estaban primeiro no lugar, "esta muller chegara a subirse á varanda da ponte, evitando nun primeiro momento que seguise coa súa intención de precipitarse".
A Policía Local subliña que "esta rápida acción e a colaboración dos axentes da Policía Local", dado o "estado de excitación no que se atopaba esta muller", impediu "outro tipo de desenlace", porque "afortunadamente unha vez que puido reterse, foi atendida de inmediato polos servizos sanitarios", que a trasladaron ao Complexo Hospitalario Universitario de Ourense (CHUO).
