Orde de investigar por detención ilegal aos policías que arrestaron ao capitán do Deportivo
O tribunal cualifica de "razoable" a indagación xurisdicional reclamada polo futbolista "en relación cunha actuación policial xa tachada repetidamente de irregular".
Por E.P. | A CORUÑA | 16/03/2021 | Actualizada ás 17:51
A sección segunda da Audiencia Provincial da Coruña ordenou a continuación do procedemento penal contra os dous axentes de policía que o pasado 5 de agosto detiveron ao capitán do Deportivo, Alex Bergantiños, pola presunta comisión dun delito de corrupción entre particulares tras facerse público un audio que enviou a un grupo privado de wasap, segundo informa o Tribunal Superior de Xustiza de Galicia (TSXG).
O caso no que se investigou ao futbolista, en relación a un audio con manifestacións súas sobre o Fuenlabrada, foi sobreseído. Agora a Audiencia da Coruña, tras estimar o recurso presentado polo xogador do Deportivo contra o auto do Xulgado de Instrución número 1 da Coruña no que ordenaba o arquivo da causa relativa ao seu arresto, decretou que se tome declaración aos dous funcionarios do Centro Nacional Policial de Integridade no Deporte e Apostas (Cendipa).
"Como investigados por un delito de detención ilegal, así como que se amplíe a declaración do prexudicado", precisa. O tribunal cualifica de "razoable" a indagación xurisdicional reclamada polo futbolista "en relación cunha actuación policial xa tachada repetidamente de irregular e que presenta indicios de reunir marcadores de tipicidade penal (detención ilegal por funcionario)".
Os xuíces indican no auto que os feitos obxectivos "pon en cuestión a necesidade conceptual da detención", pois "nada avalaba o prognóstico" de que o capitán do Deportivo non comparecería ao ser chamado a dependencias policiais, fiscais ou xudiciais, e, ademais, "de ningún xeito existía risco de fuga".
"Para afirmar a legalidade dunha detención, para descartar a desviación de poder, non basta con pescudar a obxectiva existencia dun feito delituoso e tampouco chega con percibir un xuízo indiciario de autoría, no presente caso, francamente cuestionable, é imprescindible unha valoración do perigo de fuga do sospeitoso, sen a cal se desvanece a lexitimidade da detención", subliñan os maxistrados. Ademais, recalcan que ese risco de subtracción á acción da xustiza do futbolista "nin é suxerido no ateigado nin se infere de dato algún traducido da instrución" porque "sinxelamente, non existía".
