O terceiro paquete de axudas á hostalaría de Compostela chegará a finais de marzo ou principios de abril

O goberno local de Santiago de Compostela prevé lanzar o terceiro paquete de axudas ao sector da hostalaría a finais deste mes de marzo ou principios de abril.

Este martes, o concelleiro de Turismo, Sindo Guinarte, mantivo un encontro coa presidenta da asociación Hostalaría Compostela, Sara Santos, para abordar as bases da nova convocatoria, que ascende a case 750.000 euros, cantidade que podería incrementarse ao engadirse parte dos remanentes.

Segundo trasladou o goberno compostelán ao termo da reunión, concello e sector emprazáronse a celebrar un novo encontro a próxima semana unha vez sexa estudado ao detalle o borrador da convocatoria que "en principo, axústase ás súas pretensións", sinalou Guinarte.

Ademais, o concello abre a porta a incorporar as achegas da asociación a unha liña de axudas que prevén lanzar a finais de marzo ou principios de abril coa aprobación en xunta de goberno.