Por Europa Press / Redacción | MADRID | 17/03/2021 | Actualizada ás 20:44
A Organización Mundial da Saúde (OMS) emitiu este mércores un comunicado no que recomenda seguir administrando a vacina contra o coronavirus desenvolvida pola compañía AstraZeneca porque os beneficios que achega "superan aos riscos".
O organismo de Nacións Unidas pronunciouse así despois de que algúns países europeos, incluída España, suspendesen temporalmente a inoculación desta vacina tras detectarse casos de trombos graves en persoas que a recibiron. De feito, en España está a investigarse unha morte dunha muller de 43 anos de idade en Marbella (Málaga), por ictus isquémico con transformación hemorráxica, que recibiu a vacina a principios deste mes.
"A vacinación contra o Covid-19 non reducirá as enfermidades ou mortes por outras causas. Sábese que os eventos tromboembólicos ocorren con frecuencia e, de feito, o tromboembolismo venoso é a terceira enfermidade cardiovascular máis común a nivel mundial", sinalou a OMS.
Neste sentido, asegurou que é habitual que nas campañas de vacinación os países sinalen posibles eventos adversos despois da vacinación, o que "non necesariamente significa" que os eventos estean relacionados coa vacinación en si, aínda que "é unha boa práctica investigalos". Ademais, a OMS lembrou que a notificación dos eventos adversos tamén mostra que o sistema de vixilancia funciona e que existen controis efectivos.
No entanto, e tras lembrar que está en contacto regular coa Axencia Europea de Medicamentos e os reguladores de todo o mundo para obter a información máis recente sobre a seguridade desta vacina, o seu Comité Asesor Mundial sobre Seguridade das Vacinas segue avaliando coidadosamente os últimos datos de seguridade dispoñibles para a vacina AstraZeneca.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.