Por Galicia Confidencial | Santiago de Compostela | 18/03/2021 | Actualizada ás 15:05
A poboación galega no exterior subiu en 184 persoas ao 1 de xaneiro de 2021, ata 523.856, tras caer os nados en Galicia que residen fóra pero soben os descendentes. Así o recollen os datos que publica este xoves o Instituto Nacional de Estatística (INE) do padrón de españois residentes no estranxeiro (PERE).
Pola súa banda, a Xunta destaca que o número de emigrantes galegos continúa a tendencia á baixa ao caer, en concreto, en 2.349 persoas ao 1 de xaneiro de 2021.
Mentres, resalta que é a poboación galega total que reside no exterior a que aumenta, ata sumar 523.856, pois o que soben son os descendentes de cidadáns galegos que viven no estranxeiro e que, segundo precisa a Xunta, xa naceron no seu país de destino.
En resumo, segundo o último dato, residen 184 galegos máis que o ano pasado no exterior, pero o número de emigrantes nados en Galicia que viven no exterior cae nesas 2.349 persoas e sitúase na actualidade en 147.868.
POR PAÍSES
O país que rexistra un maior incremento de poboación galega é Arxentina, que conta cunha maior presenza histórica galega, segundo sinala a Xunta, con 508 residentes máis para sumar 181.416.
Venezuela pon o contrapunto a esta tendencia cunha diminución de 968 cidadáns galegos, ao pasar de 33.278 ao 1 de xaneiro de 2020 a 32.310 este ano.
O continente americano perde desta forma 371 galegos e suma 406.651, mentres o europeo aumenta a súa poboación de orixe galega noutras 568 persoas, ata 112.693.
A Arxentina séguelle Brasil con 49.539 e Cuba con 44.283. Suíza superou en 2020 na cifra de galegos a Uruguai, con 41.169 fronte a 40.541. Venezuela mantense no sexto lugar, con 32.310, por diante de Estados Unidos con 23.175, Francia con 19.340, Alemaña con 17.600 galegos e o Reino Unido con 15.496.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.