Feijóo ve posible a ampliación "gradual" de aforamentos e horarios en hostalaría ante a situación epidemiolóxica
O presidente da Xunta lembrou que a limitación das reunións de non conviventes sexan fóra dos domicilios corresponde a unha decisión do Consello Interterritorial de Sanidade aprobado hai dúas semanas que o último comité clínico decidiu aplicar desde este venres.
Por Europa Press / Redacción | SANTIAGO DE COMPOSTELA | 18/03/2021 | Actualizada ás 15:34
O presidente galego, Alberto Núñez Feijóo, defendeu que Galicia conta nestes momentos cun marco restritivo "dos máis cautelosos" de todo o Estado e que a situación epidemiolóxica ampara a ampliación "gradual e proporcional" dos aforamentos e horarios na hostalaría que se fará efectiva a partir da medianoite deste venres.
A preguntas dos medios na rolda de prensa posterior ao Consello da Xunta, o mandatario autonómico apelou a "comparar" as medidas en Galicia coas de "o resto" das comunidades, o que o levou a sentenciar que a galega é "unha das (comunidades) máis cautelosas de España" ao estar entre as que ten menores taxas de incidencia e manter certas restricións na hostalaría.
Como exemplo disto, Núñez Feijóo apuntou que hai comunidades que "deciden manter a hostalaría ata o último instante do toque de queda" mentres que Galicia amplía desde este venres o horarios pero limítaos ás 21,00 horas.
Por tanto, sentenciou que a situación epidemiolóxica de Galicia ampara a "apertura gradual e proporcional" que, di, decretou o comité clínico na súa última reunión e que, en todo caso, será revisada "os dous primeiros días de Semana Santa". "Estamos dentro duns parámetros de cautela", engadiu Núñez Feijóo, que subliñou que o obxectivo é "evitar unha cuarta onda". "Imos ver se entre todos o conseguimos", apostilou.
REUNIÓNS DE NON CONVIVIENTES
Por outra banda, tamén a preguntas dos xornalistas, o presidente autonómico lembrou que a limitación a que as reunións de non convivientes se faga fóra dos domicilios corresponde a unha decisión do Consello Interterritorial de Sanidade aprobado hai dúas semanas que o último comité clínico decidiu aplicar desde este venres.
"Se non fose por obrigación, eu non o faría", comentou Feijóo sobre o feito de que, por exemplo, unha familia que non reside xunta poida reunirse nun bar pero non nunha casa particular. Neste sentido, sinalou que "é certo" que os establecementos de hostalaría están obrigados a velar por que en todo momento se use a máscara e manter a distancia de seguridade, medidas que son menos seguidas nas reunións en domicilios.
Por tanto, e tras lembrar que se trata dun "requisito" establecido polo Goberno central, apuntou que "primeiro eran dez amizades en Nadal e agora resulta que ningún". "Son cousas dunha pandemia e de aprender en tempo real da mesma", engadiu.
