(VÍDEO) Que opinan os galegos da vacina de AstraZeneca?

Cinco millóns de persoas recibiron xa a vacina de AstraZeneca en toda a Unión Europea, das que un millón foron administradas en España e 110.000 en Galicia. Porén, este plan de vacinación viuse paralizado debido a uns casos de trombose identificados en persoas que se vacunaran a través de AstraZeneca.

Os 30 casos de episodios tromboembólicos foron detectados en diferentes países europeos tras a administración de AstraZeneca, o que levou a 14 países a suspender a vacinación por medio de AstraZeneca. España, que conta con 3 casos de trombose relacionados coa vacina, suspendeu a administración da mesma o pasado luns 15 de marzo.

Esta situación levou a que os medios de comunicación informasen do que estaba a suceder dando prioridade á incerteza da relación entre os casos de tromboses e a vacina, en lugar de darlla aos facultativos que defenden que a vacina é segura; creando así un clima de preocupación entre a poboación, que provocou nela unha sensación de medo á vacina.

Por este motivo, a Axencia Europea do Medicamento (EMA) e a Organización Mundial da Saúde (OMS) insisten en que os casos de trombose localizados son moi reducidos e que non está probada a existencia dunha relación causal entre a administración da vacina e o episodio tromboembólico.

"A VACINACIÓN É NECESARIA PARA CONTROLAR O VIRUS"

Desta maneira, aínda que algúns non queiran vacinarse con AstraZeneca polo medo que lles xerou o coñecemento de casos de trombose relacionados coa vacina, a poboación galega na súa maioría é consciente da importancia da vacinación e anima aos seus concidadáns a poñela, xa que como sostén unha lucense: "a vacina ten riscos, pero é necesaria para controlar o virus".

Así, a Xunta de Galicia, que apostou dende o primeiro momento por seguir vacinando á poboación con AstraZeneca, anunciou o pasado xoves, 18 de marzo, que a administración destas vacinas reanudarase esta semana, co fin de vencer ao virus e conseguir o máis pronto posible a ansiada normalidade.