Proposta no Congreso para o establecemento dun protocolo COVID específico para barcos de altura
O deputado do BNG no Congreso, Néstor Rego, critica que "mesmo a atención socio-sanitaria foi diverxente entre os diferentes buques" en función da súa atracada, polo que require que se implanten estes protocolos.
Por E.P. | SANTIAGO DE COMPOSTELA | 22/03/2021 | Actualizada ás 15:18
O deputado do BNG no Congreso, Néstor Rego, rexistrou unha iniciativa na que pide o establecemento dun protocolo de actuación específico nos barcos que faenan en alto mar que asegure o cumprimento das medidas preventivas para evitar a aparición de brotes de covid a bordo, así como a coordinación das embaixadas e consulados no estranxeiro para abordar os casos que se poidan producir.
A maiores, a formación nacionalista tamén propón un protocolo para a futura vacinación do sector que atenda as características específicas dos traballadores embarcados nestes buques, as datas e duración da súa estancia, de modo que se garanta a súa seguridade e saúde.
Nas últimas semanas, apunta Néstor Rego, distintos buques galegos que viaxaban ás Malvinas foron retidos en porto por detectar un brote de covid-19 entre a tripulación. A actuación dos consulados e embaixadas "foi dispar e mesmo a información que facilitaron ás familias dos mariñeiros foi entre escasa e nula, dependendo do porto e do país de atracada".
Así mesmo, a formación nacionalista critica que "mesmo a atención socio-sanitaria foi diverxente entre os diferentes buques" en función da súa atracada, polo que require que se implanten estes protocolos.
PROTOCOLOS, PROBAS E VACINAS
"A Administración do Estado español e a galega carecen dun protocolo de actuación acordado que impida disparidades que se están dando no tratamento duns e outros casos e deben actuar de maneira coordinada", dixo o deputado, para quen "resulta difícil crer que, despois de só uns días de navegación desde a saída de porto, aparezan casos de covid-19 se as probas necesarias practicáronse de maneira efectiva e adecuada".
Nese sentido, o BNG reclama implantar tamén un "protocolo de actuación específico que asegure o cumprimento das medidas preventivas para evitar, na medida do posible, a aparición de brotes a bordo, garantindo a realización de probas de detección coa antelación suficiente".
Así mesmo, a formación nacionalista urxe establecer "de maneira clara" as actuacións que se deben adoptar no momento en que se teña coñecemento da existencia dun buque galego ou co porto base en Galicia con tripulantes a bordo positivos en covid.
Por último, Rego reclama que, dentro do protocolo de vacinación, se atendan as circunstancias específicas dos mariñeiros embarcados en alto mar, pois non poderán incluírse na previsión xeral. "Deberase atender ás datas e duración das súas estancias en terra para que reciban as dúas doses nese período, e así garantir a saúde dos mariñeiros e a seguridade a bordo", engadiu.
