Ampliado ata o 16 de abril o prazo das axudas para profesionalizar a xestión de montes veciñais
Por E.P. | SANTIAGO DE COMPOSTELA | 23/03/2021 | Actualizada ás 11:03
O Diario Oficial de Galicia (DOG) publica este martes a orde da Consellería do Medio Rural que amplía ata o próximo 16 de abril o prazo para solicitar as primeiras axudas convocadas pola Xunta para impulsar a boa gobernación nas Comunidades de Montes Veciñais en Man Común (CMVMC).
Diso informou a Xunta nun comunicado, no que detalla que esta liña de subvencións bianual dirixida ás comunidades de montes inscritas no rexistro de CMVMC apoiará cun total de 1,5 millóns de euros ata catro tipos de actuacións.
Deste xeito, en primeiro lugar, impulsarase o apoio profesionalizado á xestión forestal, con axudas á xestión administrativa e técnica para o desenvolvemento dos instrumentos de ordenación ou xestión forestal (IOXF) aprobados.
Tamén se poderá sufragar a certificación forestal do monte ou o seguimento das actuacións relacionadas, como a obtención de permisos administrativos, redacción de proxectos, memorias ou informes, tramitación de axudas públicas ou direccións de obra.
O segundo grupo de actuacións contempla achegas para a revisión dos esbozos que recollen os límites dos montes veciñais, xa que unha boa parte deles presentan inexactitudes ou erros cartográficos.
En canto ao terceiro e ao cuarto tipo de accións subvencionables, están relacionadas cos deslindamentos parciais entre CMVMC no primeiro caso, e cos deslindamentos parciais entre as comunidades de montes veciñais e terreos de particulares no segundo, para poder delimitar legalmente e dunha forma consensuada os límites entre as propiedades.
