Por Europa Press / Redacción | Santiago de Compostela | 25/03/2021 | Actualizada ás 14:36
Os sindicatos CIG, UGT e CCOO convocaron unha folga de 24 horas para o 22 de abril e de 48 horas para os días 11 e 12 de maio no sector da limpeza de edificios na provincia da Coruña polo "recorte de dereitos".
Os representantes dos traballadores explicaron que a convocatoria obedece a decisións como "a eliminación da xubilación parcial no sector e do dereito da xente que traballa na limpeza, moita dela a tempo parcial, a aumentar a xornada cando se produzan vacantes nos centros de traballo".
"Todo isto a cambio dun incremento do 0,8% para o ano 2020 e 2021", apuntou Paulo Rubido, representante da CIG. "A limpeza incrementou a súa facturación e tivo unha maior carga de traballo, xa que foi o sector encargado de realizar a desinfección e limpeza en todos os centros de traballo da provincia", argumentou en referencia ao actual contexto de pandemia.
A convocatoria de folga prodúcese despois dun calendario de mobilizacións que comezou en xaneiro e tras dúas reunións coa patronal nas que "non se moveron absolutamente nada" e nas que non fixeron "ningunha proposta construtiva", indicou. Con estas condicións, engadiu, "non se pode chegar a ningún tipo de acordo".
SERVIZOS MÍNIMOS
Por último, Rubido instou á Xunta a "que non se sitúe cos poderosos" e que os servizos mínimos que se produzan eses días "non vulneren o dereito de folga dos traballadores". Advertiu que os "impugnarán" no caso de que isto ocorra.
Para que a folga non se leve a cabo tería que haber un acordo na reunión do próximo luns. "Propomos unha suba salarial para os anos 2020 e 2021 e que non se toque o convenio", dixo Juan Carreira, representante de UGT, deixando unha porta aberta a un posible acordo. Se este non se produce, "a folga continuará máis aló de maio".
Á súa vez, Ricardo Santos, membro de CCOO, cualificou de "xustificada" a suba salarial exposta polos sindicatos e expuxo que a patronal licitou "á baixa" en contratas. Considerou, ademais, que poden pagar o prezo que reclaman os traballadores se a patronal non se comportase como "mercenarios".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.