A Deputación da Coruña destina 13,8 millóns a un novo fondo para aumentar o gasto social en concellos

Opresidente provincial, Valentín González Formoso, agradeceu o apoio unánime da corporación e destacou "a adaptación" do plan á situación actual "para dar resposta ás necesidades dos concellos e da cidadanía.

Por E.P. | A CORUÑA | 26/03/2021 | Actualizada ás 14:26

Comparte esta noticia

O pleno da Deputación da Coruña aprobou, por unanimidade de todas as forzas políticas, o Fondo Social do Plan Único, que destina 13,8 millóns para apoiar aos concellos da provincia no incremento do gasto social derivado da pandemia.

Segundo explicou o presidente provincial, Valentín González Formoso, a ampliación dos Servizos de Axuda no Fogar (SAF), reforzo do persoal de persoal nas áreas sociais dos concellos, programas de respiro familiar e conciliación familiar e laboral, adquisición de EPIs ou axudas directas ás familias máis vulnerables son algúns dos programas municipais que contarán con apoio.

No pleno, Formoso agradeceu o apoio unánime da corporación e destacou "a adaptación" do plan á situación actual "para dar resposta ás necesidades dos concellos e da cidadanía, reforzando os programas de protección social dos concellos para non deixar a ninguén atrás na saída da crise".

Do mesmo xeito que sucede cos fondos convencionais para obras e servizos do Plan Único, son os concellos os que deciden as súas prioridades á hora de investir os recursos consignados. Dos case 14 millóns de euros, algo menos da metade (6 millóns, o 43,8%) irán destinados a reforzar os Servizos de Axuda no Fogar (SAF).

No investimento por comarcas, os 26 concellos da área de Compostela recibirán un total de 4.188.063, 21 euros; os da comarca da Coruña-Betanzos preto de 3 millóns, os de Ferrolterra-Eume e Ortegal ao redor de 2,7; Costa da Morte e Bergantiños 2.262.420 euros e os de Barbanza 1.750.486 euros.

Pleno telemático da Deputación da Coruña. DEPUTACIÓN DA CORUÑA
Pleno telemático da Deputación da Coruña. DEPUTACIÓN DA CORUÑA | Fonte: Europa Press

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta