Por E.P. | SANTIAGO DE COMPOSTELA | 29/03/2021 | Actualizada ás 17:50
O alcalde de Ames, José Miñones, presentará este luns, día 29 de marzo, a súa renuncia como rexedor nun pleno extrarodinario e urxente que terá lugar ás 20,30 horas. Así informaron a Europa Press fontes municipais despois de que transcendese que o Consello de Ministros prevé nomear na súa reunión do martes a José Miñones como novo delegado do Goberno en Galicia en substitución do que fose alcalde da Coruña Javier Losada, quen exercía o cargo desde xuño de 2018.
Estas fontes municipais sinalaron que, unha vez formalizada a renuncia por parte de Miñones, ábrese un prazo de dez días para designar a un novo rexedor. En concreto, nas municipais de 2019, os socialistas foron os máis votados neste concello coruñés ao conseguir oito concelleiros. Por detrás situáronse os populares, con seis edís; o BNG, con tres; Contigo Podemos, con dous; e Ames Novo, cun.
Tras estes comicios, os socialistas de Ames chegaron a un acordo de goberno co Bloque e Contigo Podemos, tras o que Miñones foi investido alcalde do goberno tripartito. Agora, queda por saber como afectará a marcha do rexedor ao acordo local e quen será o seu substituto á fronte da Alcaldía.
MIÑONES AGRADECE A CONFIANZA DE SÁNCHEZ
José Miñones, agradeceu a confianza depositada nel polo presidente do Executivo estatal, Pedro Sánchez, para ser nomeado novo delegado do Goberno en Galicia, en substitución de Javier Losada.
Así o sinalou nun comunicado remitido aos medios, no que afirma que afronta a súa nova etapa con "ganas e ilusión" e pon en valor o labor desempeñado por Javier Losada nos últimos anos, nos que "sen dúbida" actuou como "un bo representante do Goberno na Comunidade autónoma galega".
Miñones sinala que non quere "deixar pasar a ocasión para agradecer a todas as persoas" que o acompañaron nos anos que exerceu como alcalde de Ames. "Aos membros das diferentes corporacións municipais, así como ás persoas coas que compartín goberno e á totalidade do persoal municipal, xa que, conxuntamente todos e todas fomos capaces de traballar polo ben do noso concello", indicou.
"Sen dúbida é unha honra para min ter exercido este cargo e é por iso que dou as grazas aos veciños de Ames por trasladarme sempre o seu apoio e comprensión", sinala Miñones, que asegura que sempre levará ao municipio "na súa cabeza e corazón".
"SATISFACCIÓN" DO PSOE CORUÑÉS
Tras coñecerse a decisión, o PSOE provincial coruñés trasladou a súa "enorme satisfacción" polo nomeamento de Miñones, decisión que cualifican de "gran acerto". Ademais, agradeceu "o tempo e a dedicación" de Javier Losada.
A dirección provincial do PSOE coruñés ve en Miñones a unha persoa con experiencia como alcalde e un "magnífico xestor", cualidades que "lle permitirán realizar un magnífico traballo como delegado do Goberno en Galicia".
"Miñones é un bo exemplo do municipalismo do PSdeG e estamos seguros de que fará un gran traballo explicando as políticas do Goberno de España e dirixindo a administración do Estado en Galicia", sinala.
"Para todas e todos os socialistas galegos, e para os coruñeses en especial, é unha gran noticia que se apostou por Miñones para un posto tan relevante. Estamos satisfeitos e cremos que esta elección sintoniza perfectamente co que necesita Galicia e co que necesita o PSdeG", apunta.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.